.webp){kind=icon}
Повеќето централни банки веќе најавија некаков хоризонт, некоја граница кога каматното затегнување ќе застане, вели во интервју за „Блумберг Адрија“ Бојан Цветановски, претседател на „АЦИ Македонија“. Тој посочува дека ако гледаме историски на прашањето дали каматните стапки сега се високи или нормални, може да се каже дека се на едно нормализирано ниво.
„Имаме различна историја. Во македонската економија сме имале и повисоки каматни стапки. Ако ги земеме Федералните резерви, каматниот бенчмарк на американскиот долар, исто така историски гледано, имал каматна стапка од 10 отсто, a во некое не многу далечно минато имаше каматна стапка од 6 проценти. Ако ја земеме стапката на депозитни средства на ЕЦБ, имаме 4 отсто, што е рекорд во постоењето на ЕЦБ и на еврото“, вели Цветановски.
Цветановски смета дека сега има нормализирање на монетарната политика и на каматната политика на централните банки. „Во изминатите 10-15 години имавме ексклузивно ниски каматни стапки, кои на некој начин беа неприродни. Цената на капиталот беше прениска, во некои ситуации дури имавме негативна каматна стапка кај еврото, што создаде инверзна логика на финансиските пазари“, посочува Цветановски.
Тој додава дека рецесивните закани укажуваат дека треба да се стопира зголемување на каматните стапки во Европа.
„Мое мислење е дека и нашата економија и ЕЦБ се при крај на зголемување на каматните стапки. Евентуално може уште едно зголемување, меѓутоа тоа би било завршен потег на овој циклус на зголемување на каматни стапки“, вели Цветановски.
Тој дополнува дека дивергенцијата помеѓу американската економија и еврозоната расте во корист на американската економија.
„Перформансите на американската економија засега се одлични, додека еврозоната е во рецесија. Ќе се зголеми каматната разлика помеѓу американскиот долар и еврото. Јас очекувам одново паритет евро - долар, дури и посилен долар од еврото во следниот период од шест месеци“, вели Цветановски.
