Монетарните власти и натаму ќе бидат претпазливи во носењето на одлуките за пад на каматните стапки. „ЕЦБ ќе почека да види дали инфлацијата и понатаму ќе паѓа и што ќе се случува на полето на цената на нафтата“, вели во интервју за „Блумберг Адрија“ Бојан Цветановски, претседател на „АЦИ Македонија“, а НБРМ ќе ги следи нејзините потези.
„Најдоцна до јуни ЕЦБ ќе има едно кратење од 25 базни поени, а НБРМ ќе ја следи политиката на ЕЦБ. И Европската централна банка и Народната банка на Македонија ќе одат внимателно и тие чекори на намалување на каматните стапки ќе бидат постепени. Мислам дека во Македонија стапката на благајнички записи евентуално може да дојде до 5,50 во неколку чекори или нешто пониско, евентуално до пет, меѓутоа не пониско“, вели Цветановски.
Цветановски посочува дека иако се смета дека сега можеби е созреан моментот за пад на каматите во еврозоната, сепак функционерите на ЕЦБ ги загрижуваат цените на одредени стоки. Цената на нафтата од почетокот на годината расте.
„Тој раст беше постепен, меѓутоа во последните две недели има одредена акцелерација. Не е тоа значителна акцелерација, меѓутоа од почетокот во јануари беше 73 долари за барел, сега е 84 долари за барел, тоа е пораст над 10 отсто. Но со актуелната цена на соодносот евро-долар, каде што историски гледано коефициентот евро-долар покажува дека доларот сега е поскап во однос на еврото, што значи дека нафтата сега е скапа за еврозоната, тоа може да предизвика некои нови инфлаторни предизвици и притисоци“, вели Цветановски.
Фед има три сценарија
Кај американската економија показателите за минатата година укажуваат дека станува збор за една економија во експанзија. Има раст на бруто-домашниот производ од 2,5 отсто, невработеност 3,7 отсто, пораст на продуктивноста 4 отсто и силен долар.
„Во САД беа уверени дека Фед во март ќе ги крати каматните стапки, а тоа беше иницирано со изјавата на претседателот Пауел, меѓутоа сега веќе има три струи. Една група што сè уште очекува дека ќе има намалувања во текот на годината, меѓутоа со помал чекор, има друга група што кажува дека каматните стапки ќе останат исти и има трета струја, која е најмала, меѓутоа тука има луѓе што порано работеле во Фед и кои кажуваат дека Фед ќе направи пауза, а дека следниот чекор ќе биде нагорен во однос на каматите“, вели Цветановски.
Треба да се обрне внимание и на тој став, затоа што ако се вратиме 2000 година, при вакви стапки на инфлација во САД и при слична ситуација имаше каматни стапки на американскиот долар од шест проценти, а сега се 5,50.
Меѓутоа, клучна информација ќе биде перформансот во првиот квартал на економијата на САД.