.webp){kind=icon}
Доларот во втора половина на годината има добри можности за раст во однос на еврото, па дури, не би се изненадил одново да има паритет евро-долар, вели во интервју за „Блумберг Адрија“, Бојан Цветановски, претседател на АЦИ Македонија.
Тој анализира дека дури некаде кон средината на 2024 година можеби ФЕД ќе може да започнат да размислуваат за намалување на каматните стапки, а американскиот долар оваа година сепак ќе има продолжена каматна поддршка и разликата во каматите помеѓу американскиот долар и еврото ќе биде во полза на „зелената банкнота“.
Цветановски појаснува дека американскиот долар на почетокот на годината паѓаше во однос на еврото, поради тоа што финансиските пазари претпоставуваа односно калкулираа во курсот кратење на каматните стапки на Федералните резерви, што би се случило од ноември оваа година натаму, но додава дека, како што сега гледаме, за тоа нема да стане збор оваа година.
Очекувањата се инфлацијата во Македонија наесен да биде под 10 отсто. Според Цветановски, инфлацијата опаѓа со поголем или со помал чекор, меѓутоа цело време е во тренд на опаѓање. Монетарната политика, вели, си го прави своето, а добро е што каматните стапки се зголемија. Битен е и пазарот на електрична енергија, во принцип пазарот на електрична енергија и на нафтени деривати сега е стабилизиран и цените се во пад и тоа е и добро за нашата стапка на инфлација да продолжи да паѓа.
„Мислам дека сега НБРМ уште еднаш ќе ја зголеми каматната стапка на благајничките записи и тука ќе застане. Е сега, кога ќе дојде до приближување на каматната стапка на благајничките записи со стапката на инфлација во нашата економија тогаш ќе почнат да се создаваат услови за намалување на стапката, меѓутоа мислам дека тоа ќе биде наредната година. Во меѓувреме, кај деловните банки ќе имаме уште еден бран на зголемување на каматните стапки или она акомодирање и усогласување со политиките на НБРМ“, вели Цветановски.
