Неделата зад нас беше обележена со низа одлуки на водечките светски централни банки. Додека стравот од инфлација што ја зафати глобалната економија по пандемијата полека стивнува, сепак нема решителна акција за почеток на циклус на олабавување на монетарната политика.
„Инфлаторни ризици сè уште има и времето на скапи пари или високи камати нема да заврши брзо“, вели во интервју за „Блумберг Адрија“ финансиската техничка аналитичарка и претседателка на асоцијацијата СЕЕМТ, Снежана Поповска.
Според Поповска, последните одлуки на пример на Фед и ЕЦБ да останат на пауза и да ги задржат каматите на постојното ниво беа очекувани.
„Ако ги погледнеме цените на приносите на државните обврзници во САД и во Европа, ќе забележиме дека приносите повторно растат, а тоа не е средина во која очекуваме дека ќе има намалување на каматните стапки. Моментално економијата на Америка е премногу силна и имаме период каде што потрошувачите трошат повеќе пари, така што и покрај очекувањата за намалување на каматите, не очекувам брзо да се случи тоа. Приносот на пример на десетгодишните обврзници расте и тоа што го очекувам во наредниот период е да достигне принос до 4,85 п.п. Минатата недела и Јапонија по 17 години одлучи да ја зголеми каматната стапка, а со оглед дека јапонските инвеститори се најголеми купувачи на пазарот на државни хартии во Америка, верувам дека доколку се намалат приносите на државните обврзници во САД, јапонските инвеститори ќе почнат полека да се пренасочуваат кон инвестирање на нивниот домашен пазар. Ни сликата во Европа не е нешто поинаква и таму очекуваме да порасне приносот на 10-годишните обврзници и да се достигне ниво од 3,20 проценти поени“, вели Поповска.
Според неа, пад на каматите би имало кон крајот на 2024 година, а корекцијата би била минимална.
Поповска додава дека неопходно е ресетирање на економиите и прилагодување на новите трендови. Смета дека новото ниво на нормална или целна инфлација во иднина ќе биде над 2 отсто.
„Во наредните неколку години ќе живееме во период на повисоки каматни стапки. Дури и да има намалување, тоа ќе биде минимално намалување. Повеќе од 10 години живеевме со негативни каматни стапки и верувам дека ќе треба време на приспособување на новиот тренд, бидејќи имаме преголемо количество на пари во оптек и ќе треба време тоа да се нормализира. Затоа и верувам дека и покрај тоа што централните банки се цврсто насочени кон сведување на инфлацијата на 2 отсто, во наредниот период ќе живееме во нова реалност, каде што нормалната стапка на инфлација ќе биде 3 отсто. Во поглед на ризиците, најмногу ќе биде засегнат приватниот сектор, бидејќи се зголемуваат неговите трошоци и сметам дека допрва ќе се почувствува оваа каматна политика врз работата на бизнисите и изворите на капитал за нивно финансирање“, вели таа.
Со Поповска зборувавме и за сектори со најголем скок во вредност на акциите, како и за движењето на берзанските стоки.