.webp){kind=icon}
Проекциите на НБРМ за годишната стапка на инфлација се 9,5 отсто, додека Владата има пооптимистичко сценарио за 6 отсто. Секако, НБРМ очекува и забавување на економијата, односно раст на БДП од 1,9 отсто.
Блумберг Адрија
„Сепак, треба да се фокусираме на последната бројка за инфлацијата во октомври од 3,5 отсто, што значи дека сме на добар пат кон посакуваната цел од два отсто“, вели во интервју за „Блумберг Адрија“ Бојан Цветановски, претседател на „АЦИ Македонија“.
Блумберг Адрија
Тој посочува дека во континуитет има добар пад на инфлацијата благодарение на навремените монетарни мерки преземени од Народната банка, но и на намалените цени на стоковниот пазар.
„Очекувам од следната година каматните стапки да останат исти. Мислам дека Народната банка веќе нема да ги зголемува стапките. Кај благајничките записи стапката од 6,3 отсто ќе остане иста некаде до средината на 2024 година, кога сметам дека ќе постојат услови за некој почеток на намалување на каматните стапки, се разбира, ако продолжи ова темпо на намалување на инфлацијата“, вели Цветановски.
Тој додава дека сепак и тука мора да се има предвид дека имаме еден меѓународен ризик-фактор.
„Имено, во последните две години стоковниот пазар, вклучувајќи ги тука и нафтата и електричната енергија, главно зависи од безбедносниот аспект. Значи, моментално во светот имаме две жаришта и доколку дојде до некое нивно проширување, одново ќе имаме ризик од пораст на цените на суровините, што би преставувало некој инфлаторен ризик“, вели Цветановски.
Блумберг Адрија
Во септември, пак, просечната каматна стапка кај депозитите изнесува 1,59 отсто и бележи годишен раст од 0,89 процентни поени. Депозитите на домаќинствата, од пандемијата досега, се зголемени за 20 проценти. Граѓаните им имаат доверено 340 милијарди денари на банките, а Цветановски смета дека штедењето во македонски денари и натаму ќе остане поатрактивно.
