.webp){kind=icon}
Актуелниот бум од инвестиции во обновливи извори на енергија, особено во фотоволтаици, го отвори прашањето колку системот може да ја издржи новата инсталирана моќност.
Универзитетскиот професор Драган Миновски во гостување во емисијата „Зум ин“ вели дека е неопходно државата, меѓу другото, да обезбеди можност за компаниите што инвестирале во обновливи извори на енергија да имаат и свои системи за складирање на енергијата со цел да ги намалат трошоците, но и да влијаат на постабилно производство и електроенергетски систем.
Освен тоа, според Миновски, неопходно да се направи ревизија на државната зелена стратегија за да се види кои се можностите и потребите на државата од инвестициите во обновливите извори на енергија.
„Во претходниот период со кризата бевме сведоци на неконтролирано инсталирање фотоволтаици. Ќе кажам неконтролирано затоа што во тоа производство не беа координирани сите енергетски субјекти во државата. А, што треба прво да се подготви? Тоа е брза ревизија на енергетската стратегија и донесување законски и подзаконски акти за системи за складирање енергија, како и можност овие системи да бидат поедноставно имплементирани во електроенергетскиот систем, сè со цел во наредниот период да имаме зголемено производство на електрична енергија од обновливи извори и постабилен електроенергетски систем. Но во наредниот период е потребно да се направат и анализи за тоа колкави се реалните потреби на општеството за енергија, предвидувајќи ги сите оние аспекти од енергетската транзиција, како во делот на транспортот, така и во делот на користењето енергија за потреби во домаќинствата и во индустријата за да бидеме подготвени со сите анализи и сите пречки што би дошле во периодот што следува. Клучно во моментов е да се подготви една можност компаниите што веќе инсталирале фотоволтаични електроцентрали и вакви варијабилни производствени капацитети во своето работење да можат да имплементираат и нови системи за складирање на енергијата, сè со цел да ги намалат трошоците, но и да влијаат на постабилно производство и постабилен електроенергетски систем во наредниот период“, вели Миновски.
Според него, државата успешно се справи со енергетската криза, во што удел имаше и топлата зима, па потребите за енергија беа намалени. Сега, како што вели, клучни се подготовките за следната сезона.
„Подготовките треба да почнат во моментов. Потребно е да се обезбеди поголемо количество јаглен. Доколку немаме доволно количество, потребно е да се обезбеди од увоз, потребно е да се обезбеди гас, да се направат договори и преддоговори за количества на мазут во случај на зголемена потреба од енергија. Сите овие активности мора да се почнат сега, бидејќи доколку не се направат овие анализи, во септември и октомври веќе е доцна и може да влеземе неподготвени во новата грејна сезона“, вели Миновски.
Миновски во интервјуто зборува и за состојбите на домашните енергетски капацитети, ефектите од владините мерки за надминување на енергетската криза и состојбата со цените на енергентите.
