Компаниите со традиционален модел што нема да го следат чекорот со новите трендови и иновации нема да можат да опстојат на пазарот, вели во интервју за „Блумберг Адрија“, Орце Симов, потпретседател на Сојузот на стопански комори.
Тој посочува дека стопанството не може да се потпира само на владини мерки за помош, туку дека на македонската економија ѝ се потребни суштински реформи за развој.
„За македонското стопанство да се развие мора да се најде начин да се промени целокупно моделот, не да се оди со некакви инстантни мерки, некому да му се помогне со некаква субвенција во моментот итн. Ние треба да најдеме што е тоа што му одговара на македонското стопанство за да се развива во иднина, кои се трендовите сега во светот и на што да се работи. Во моментов, за да избегне светот климатска катастрофа, прогласена е карбонска неутралност, односно емисија на CO2 до 2050 година на нула. Тука постојат огромни можности, треба да се променат многу работи во производството во градежната индустрија, во производството на цемент и челик, треба да се променат многу работи во производството на електрична енергија и неупотреба на фосилни горива. Доста промени во транспортот на стоки и луѓе, во земјоделството и производството на храна се потребни многу 'брејктру' иновации и нови технологии, исто така и во греењето и ладењето. Така што оваа работа ќе промени многу бизниси и сите бизниси што ќе останат традиционални нема да можат понатаму да постојат, ќе имаат високи трошоци. И во Македонија за CO2 ќе се плаќаат значителни суми пари, почнувајќи од 2026 година. Ние мораме да најдеме начин како да фатиме чекор со современите економски текови“, вели Симов.
Но предизвик во трансформацијата на бизнисите и инвестициите во иновации ќе бидат и високите каматни стапки, со оглед на агресивната монетарна политика.
„Да, затегнувањето на монетарната политика од друга страна ги влошува условите за бизнис, бидејќи пристапот до финансиски средства е многу поскап од порано и тие компании што имаат земено кредити за одредени инвестиции без да го сметаат тоа во нивните бизнис-планови, сега враќаат значително поголеми суми на пари. А, тие пак што планираат нови бизниси, сега треба да пресметаат во своите бизнис-планови дека пристапот до финансиски средства е многу поскап и дека каматите се многу повисоки. Така што затегнувањето на монетарната политика не води кон развој на економијата, туку кон стагнација“, вели Симов.