Најголемиот удар од економската криза паѓа на грбот на малите фирми. Потребни се мерки за поддршка за поголема видливост на компаниите и полесен пристап до финансии, вели во интервју за „Блумберг Адрија“ Габриела Кулебанова, претседателка на новоформираниот Центар за микро, мали и средни претпријатија при СКСМ.
„Центарот ќе биде една нова алатка за поддршка на развојот на малите, микро и средните претпријатија. Во нашата држава, според статистичките податоци, 99,6 проценти се токму мали, микро и средни претпријатија. Од друга страна, тие вработуваат 70 проценти од вкупниот број вработени во нашата држава. Оттаму е и големата важност за поддршка на овој сегмент на компании. Препознавајќи го овој факт и важноста токму во овој момент, Стопанската комора се насочува кон правење на оваа алатка и поддржување на целокупната економска активност токму кон оваа група компании. Ние како центар активноста ќе ја насочиме токму кон поддршка на различни сегменти на овие компании за да бидат видливи. На истите тие ќе им се дадат одреден стимул и мотивација, каде што ќе се насочиме кон поголем раст и развој токму кон овој сегмент на компании“.
Таа потенцира и дека малите компании се поттикнувачи на процесот на воведување иновативни решенија, но слабост им е што сами не можат да ги имплементираат овие процеси, бидејќи имаат недостиг од средства за инвестиции, кадар и опрема.
„Нотирајќи ги овие проблеми, наш фокус ќе биде креирање корисни програми за овие претпријатија, консултации, стручна помош за обезбедување финансиска поддршка, информации за состојбите на пазарот и прописите, пристап и поддршка за иновации, обезбедување контакти во рамките на компаниите, поддршка до фондови за инвестициски развој, можност за регрутација на работната сила и обуки за преквалификација на работната сила, унапредување на менаџерските вештини, соработка со институции и другите донатори, промоција на услугите на компаниите итн. и, секако, други видови активности што ќе бидат предложени од овие компаниите и кои се од нивно значење. Ни претстои период во кој треба да работиме сериозно за унапредување на овие компании“, вели Кулебанова.
Нов предизвик годинава се и двојните избори, кои, како што вели, ќе ја блокираат домашната економска активност најмалку пет месеци. Таа посочува дека затоа се потребни механизми за да ѝ се овозможи на економијата да пребродува вакви периоди.
„Нотирањето и важноста за поддршка од самите влади на овој тип компании доведува до намалување на сиромаштијата и раст на БДП. Така што и ние како центар ќе вршиме притисок врз надлежните за да им се помогне на компаниите“, вели претседателката на Центарот за поддршка на микро, мали и средни претпријатија.