.webp){kind=icon}
Раст на бројот на туристи во првата половина од годинава за разлика од лани покажуваат статистиките на Државниот завод за статистика.
Во периодот јануари - јуни 2023 година, во однос на истиот период во 2022 година, бројот на туристите е зголемен за 30,1 отсто, при што кај домашните туристи има зголемување за 2,8, а кај странските за 46,8 отсто.
Бројот на ноќевањата, пак, е зголемен за 18,8 отсто, а вкупно во јуни годинава земјава ја посетиле вкупно 110.319 туристи.
Директорот на Агенцијата за поддршка и промоција на туризмот, Љупчо Јаневски, очекува годинава да биде рекордна за туристичкиот сектор и да ги надмине и бројките од претпандемиската 2019.
Гостување на Љупчо Јаневски, директор на Агенцијата за поддршка и промоција на туризмот
Bloomberg Adria
Во изјава за „Блумберг Адрија“ Јаневски вели дека до крајот на годината очекувањата се дека бројот на ноќевања на странски туристи ќе дојде и до 3,3 милиони.
„Веќе 2019-та не е референтна година за туризмот. Оваа година врвот на сезоната започна некаде во јули и се очекува да биде и длабоко во септември. Сите туристички места и Скопје се полни со туристи, со групи, како регионални така и со групи што досега ја одминуваа Македонија како туристичка дестинација. Веќе во јуни статистиката покажува раст во споредба со 2019 година, додека туристичката индустрија и туристичкиот промет во првиот квартал од 2023-та се подобри од 2022 година, односно годината во која се постигнаа рекордни резултати во туристичкиот промет во Македонија. Очекуваме, речиси и сигурни сме дека во 2023-та ќе ги надминеме резултатите од 2019-та, приближувајќи се до 3,2-3,3 милиони ноќевања, што претставува всушност и рекордна бројка. Односно очекуваме туристичкиот промет да надмине половина милијарда долари директно во македонската економија“, вели Јаневски.
Bloomberg Adria
Но колку државата води сметка за развој на овој сектор, кој е важен двигател на економијата? Јаневски потенцира дека отсуствува државна стратегија, но вели дека се работи и на тој проблем.
Bloomberg Adria
„Можеби во одредени општини туризмот не се третира на начин на кој треба и покрај тоа што голем дел од општините сè повеќе се фокусирани на развојот на туристичкиот сектор. А важноста на туризмот ја покажуваат бројките – ако во 2011 година туризмот во македонскиот БДП бил некаде околу 1 отсто, веќе во 2022-та е 3,6 отсто. Околу 33.000-35.000 луѓе работат во оваа индустрија. И покрај тоа што инфраструктурните проблеми сè повеќе се надминуваат, сметам дека долгорочната стратегија, која во моментов отсуствува за македонскиот туристички сектор, треба да биде приоритет. Да се види каде ќе биде туризмот наредните 15-20 години. Во овој момент се подготвува долгорочна стратегија на Владата, туризмот таму е третиран на високо рамниште и се надевам дека структурните промени и подобрувањата на Законот за туристичка дејност во македонската економија ќе донесат резултати. Мислам дека во наредните 5-10 години туризмот ќе биде еден од главните столбови на македонската економија“, вели Јаневски.
Иднината на туризмот, пак, директорот на Агенцијата за поддршка и промоција на туризмот ја гледа во екотуризмот.
