Јавниот долг во Македонија во вториот квартал од годинава надмина 8,3 милијарди евра и изнесува 57,9 отсто од БДП.
„Трендот на зголемувањето на јавниот долг не нè охрабрува. Очигледно е дека пребрзо се зголемува јавното задолжување“, вели во интервју за „Блумберг Адрија“ даночниот експерт Павле Гацов.
Тој додава дека тука се државниот долг и оној додаток што го прават јавните претпријатија односно друштва каде што државата е сопственик. А растот на јавниот долг не е соодветен на растот на економијата, на БДП, на инвестициите.
„Задолжувањето не покажува ефекти и произлегува дека генерално е во насока на покривање тековни расходи. Ако постоеше човечка оправданост на високиот раст на јавниот долг речиси малку под една милијарда евра во 2020 година, кога имавме ковид, по 2020 и од 2021 година наваму очигледно е дека политиките околу јавниот долг треба да се водат многу повнимателно и попрудентно“, посочува Гацов.
Тој смета дека ако продолжи ваквиот тренд, очигледно е дека товарот на јавниот долг значително ќе ги отежне понатамошниот раст и развој на македонската економија.
„Во последните пет години, со исклучок пред ковид, од 2020 година наваму, имаме годишен раст на јавниот долг од 400 до 600 милиони евра. Во 2020 година речиси една милијарда, што за ваква мала економија како што е нашата е навистина премногу“, вели Гацов.
Тој смета дека не охрабруваат ниту податоците за дефицитот во буџетот, бидејќи на крајот тие се претвораат во јавен долг.
„На крајот, како држава трошиме повеќе од тоа колку собираме. Се однесуваме недомаќински на некој начин и очекуваме во нареден период, барем по изборите, кои следуваат во 2024 година, некоја следна влада да повнимава, односно значително да ги намали трошењата што не се продуктивни, а од друга страна да обезбеди приходи соодветно колку што троши“, вели Гацов.
Според Гацов, задолжувањето не е проблем ако растот е поголем од задолжувањето.
„Споредбата во економијата е колкав е растот во задолжувањето во однос на растот на БДП. Со оглед на тоа што следната година е изборна, извесно е дека го продолжуваме трендот на лоши финансии во однос на јавните финансии, во контекст на тоа дека трошиме повеќе одошто заработуваме и тоа прерасна во тренд, кој е доста силен и на долг рок ќе носи товар на долг за Македонија“, заклучува Гацов.