Бруто полисираната премија кај друштвата за осигурување живот во Македонија во третиот квартал од годинава е зголемена за 9 отсто во споредба со истиот период лани, додека за 24 отсто има раст кај бруто исплатените штети. Пазарот на осигурување и осигурување живот постојано расте, а тоа може да го потврдиме и низ бројките, вели Маја Станковска Костова, генерална директорка на „Кроација осигурување - живот“ во интервју за „Блумберг Адрија“.
„Бележиме раст на реализирана премија по основа на осигурување и животно осигурување. Освен премијата, расте и бројот на договори и бројот на осигуреници, а од друга страна сметам дека сме пазар што може уште да расте, има простор, а тоа го покажуваат бројките од регионот“, вели Костова.
Таа додава дека ако се земат бројките колку има реализирана премија по жител во Македонија, тоа е некаде околу 20 евра годишно. Толку пари се издвојуваат по лице за осигурување по живот.
„Правиме споредба со Хрватска, таму е 100 евра по жител годишно. Верувам дека сите ќе се согласиме дека има влијание животниот стандард, приходите што ги остварува населението, од друга страна ќе се согласиме и дека просечната плата во Хрватска не е пет пати поголема од просечната плата во Македонија“, вели Костова.
Таа додава дека смета оти тука има еден голем простор за работа, а особено одговорност има осигурителниот сектор да продолжи со финансиска едукација односно пренесување на информацијата за потребата и бенефициите да се поседува полиса за осигурување.
Инфлацијата се одрази и врз осигурителниот бизнис?
Изминатиов период имавме повеќе проблеми што се рефлектираа врз економската активност, а една од нив беше инфлацијата.
„Инфлацијата не го одмина осигурувањето, од една страна имаме зголемени трошоци на работење, а од друга страна имаме состојба каде што се намалува куповната моќ за осигурување односно се рефлектира во доменот на животното осигурување каде што не е задолжително осигурување“, вели Костова.
Таа заклучува дека намалувањето на куповната моќ значи и преиспитување на одлуката дали сега е моментот да се склучи полиса за осигурување живот а има и ситуации каде што некој поради неможност на плаќање на договорите не може да ги сервисира и тие договори се прекинуваат.