.webp){kind=icon}
Осигурителниот сектор во Македонија се врати во живот по тешкотиите со кои се соочи за време на пандемијата на ковид-19 и минатата година забележа значително подобри финансиски резултати. Вкупната добивка по оданочување, на ниво на сектор, во 2022 година изнесуваше 531,1 милион денари (8,6 милиони евра). Колку за споредба, за 2021 година добивката изнесуваше 135,6 милиони денари или околу 2,2 милиона евра.
Позитивни резултати лани беа забележани во двата сегмента на осигурување – животно и неживотно. Друштвата за неживотно осигурување лани имаа вкупна добивка од 307,2 милиони денари (4,9 милиони евра), за разлика од претходната, 2021 година, кога вкупниот резултат беше негативен и тие забележаа минус од 50,7 милиони денари (825.000 евра). Друштвата за осигурување живот лани остварија добивка од 223,9 милиони денари (3,6 милиони евра), што е зголемување во однос на претходната година, кога вкупната добивка изнесувала 186,3 милиони денари или околу три милиони евра.
Во текот на 2022 година на осигурителниот пазар функционираа 16 друштва за осигурување, од кои 5 друштва за осигурување работат на осигурување живот, додека преостанатите 11 вршат работи на неживотно осигурување.
Според Агенцијата за супервизија на осигурувањето (АСО), растот на обемот на работење на друштвата за неживотно осигурување изразен преку порастот на бруто-полисираните премии при релативно многу помал пораст во расходната страна од техничката пресметка од билансот на успех е главната причина за значителното подобрување на профитабилноста во секторот на неживотните осигурувања во 2022 година споредено со претходната, 2021 година. Во сегментот на осигурување живот исто така има подобрување на профитабилноста, анализирано на ниво на агрегиран биланс на успех.
„Слично на причините во сегментот на неживотните осигурувања, и во осигурувањето живот главна причина за подобрување на профитабилноста во 2022-та во споредба со 2021 година е растот на премиите, при релативно исто ниво на реализирани оперативни трошоци и намален раст на математичката резерва во 2022 споредено со растот во 2021 година“, се наведува во годишниот извештај на АСО.
Што покажуваат стапките на принос?
Стапката на принос на вложувања (ROI), која се пресметува како однос на приходите намалени за трошоците на вложувањата и износот на вложувањата, за 2022 година во осигурителниот сектор изнесува 2,85 отсто и бележи пад во однос на претходната година (2021: 3,89 отсто). Стапката на принос на средства (ROA), која се пресметува како однос на добивка/загуба пред оданочување и вкупните средства на ниво на индустрија, изнесува 2,08 отсто, што значи пораст во однос на претходната година, кога изнесувала 0,72 отсто. Стапката на принос на капиталот (ROE), која се пресметува како однос на добивка/загуба пред оданочување и категоријата капитал и резерви од билансот на состојбата, изнесува 7,77 отсто наспроти 2,56 отсто во 2021 година.
Раст на осигурителниот сектор и во 2023 година
Од Агенцијата веќе соопштија дека вложувањата во неживотни осигурување достигнаа три милијарди денари (48,4 мил.евра) за првите три месеци годинава. Граѓани, фирми и институции во овој период вложија 19,5 отсто односно 7,9 милиони евра повеќе од истиот период во 2022 година. Во првото тримесечје годинава се склучени над 369.000 договори за осигурување, што е за 20 отсто повеќе од истиот период лани, покажуваат официјалните податоци што до АСО ги доставиле 11-те компании за неживотно осигурување.
„Евидентно е дека растат вложувањата во сите поголеми доброволни класи осигурување, а расте и вредноста на полисите за задолжителното осигурување од автомобилска одговорност“, соопштија неодамна од АСО.
Најпопуларна односно најбрзорастечка класа во овој период е приватното (дополнително) здравствено осигурување. За првите три месеци годинава се склучени над 11.700 договори, што е за 50 отсто повеќе од првиот квартал претходната година. Во приватно здравствено осигурување граѓаните за своите семејства и компании за своите вработени вложиле 367,5 милиони денари (6 милиони евра). Интересот за вложување во приватно здравствено осигурување пораснал за 62 отсто во споредба со првото тримесечје претходната година.
Најголемата доброволна класа – осигурувањето имот исто така бележи раст за 10,5 отсто. Вкупните вложувања на граѓани и правни лица за осигурување имот достигнале 612 милиони денари (10 милиони евра). Склучени се речиси 38.500 договори за осигурување имот и нивниот број е за 6 отсто поголем од истиот период лани. Од другите доброволни класи, вредно е да истакне дека има солиден раст на продажбата на полиси кај каско-осигурувањето возила. Вкупната продажба на каско-полиси достигна 272 милиона денари (4,4 мил.евра), што е за 26 отсто или речиси еден милион евра повеќе од истиот период лани.
