Употребата на вештачките ѓубрива во 2022 година беше драстично намалена поради високите цени, а тоа, пак, влијае на приносот на земјоделските производи и нивните цени.
„Во Македонија во 2020 година беа увезени некаде околу 96 илјади тони вештачки ѓубрива од најразлични типови. Тој увоз драстично се намали во наредните две години, па во 2022 година увезовме само 56 илјади тони вештачко ѓубриво“, вели за „Блумберг Адрија“ Никола Деребанов, управител во компанијата „Перминдекс“.
Тој додава дека причината за намалениот увоз на вештачки ѓубрива е поради тоа што цената е зголемена за некаде 180 проценти.
„Во годината што измина, односно во 2023-та гледам има слично ниво на користење минерални ѓубрива, од околу 56 илјади тони. Овие податоци се за месеците од јануари до ноември. Недостига само декември, но тоа нема да смени ништо драстично“, вели Деребанов.
Тој додава дека единствено позитивно е дека цената на овие ѓубрива се намали, што ќе донесе намалување на трошоците на нашите земјоделски производи.
„Цената на вештачките ѓубрива во 2023 година беше намалена за 28 отсто во однос на 2022 година, но, за жал, нашите земјоделци не употребиле доволно вештачко ѓубриво. Очекувам овие цени да продолжат да се намалуваат во првиот квартал од 2024 година и се надевам дека ќе се употребат повеќе, ако ништо друго, барем азотни ѓубрива за културите што веќе се засадени“, вели Деребанов.
Тој заклучува дека намалената употреба на вештачки ѓубрива значи намален принос, што автоматски ја зголемува цената на чинење по единица производ.