Занаетчиите бараат да бидат ослободени од придонеси за зголемување на платите од три до десет илјади денари, како што налага законот за финансиска поддршка, а кој сега се однесува на три сектори, и тоа градежништво, угостителство и текстилна индустрија. Владата на 28 ноември го објави пакетот антикризни мерки, каде што се предвидува ослободување од плаќањето на придонесите за пензиско и здравствено осигурување во приватните компании, но само за три гранки – градежништвото, угостителството и текстилната индустрија.
„Во последните измени односно предлози на Законот на финансиска поддршка на придонеси за зголемување на платите занаетчиите не се ставени. Ставени се три сектори, меѓу кои угостителство и туризам, а занаетчиите се испуштени. Ние како комора поднесовме амандмани за измена на законскиот предлог, во кој би сакале сепак занаетчиите да влезат како еден од секторите на кои им треба финансиска поддршка за навистина да опстанат во овие услови“, вели Анета Атанасовска, извршна директорка на Занаетчиската комора од Скопје, во интервју за „Блумберг Адрија“.
Таа посочува дека овој сектор има слаба поддршка од државата и од локалните самоуправи. Атанасовска објаснува дека за занаетчиите постои програма за претприемаштво и конкурентност, која се спроведувана годишно ниво од страна на Министерството за економија, каде што занаетчиите можат да аплицираат за субвенционирање за набавка на алат и машини за работа во своите простории.
„Меѓутоа, таа финансиска поддршка е многу мала на ниво на територијата на државата и исто така на ниво од локалните самоуправи. И Град Скопје има програма на која може да аплицираат занаетчиите. Меѓутоа износот на финансиската поддршка, особено за старите занаети, е многу минимален, дури и занаетчиите не сакаат да аплицираат затоа што износот е многу низок“, вели Атанасовска.
Таа додава и дека клучен предизвик и натаму останува нелојалната конкуренција, но и недостигот од кадри.