.webp){kind=icon}
И покрај трендот на раст на платите, македонските просечни бруто-плати и натаму се најниски во регионот. Само Македонија и БиХ имаат просечна бруто-плата под 1.000 евра.
Според претседателот на Бизнис-конфедерацијата на Македонија, Миле Бошков, причина, меѓу другото, е слабата економска активност на државата.
Миле Бошков (ТВ-гостување)
Блумберг Адрија
„Потрошувачката, движењето и циркулацијата во економијата се многу слаби. Ако се земе предвид кондицијата на македонското стопанство на домашен и странски терен, јасно е дека немаме некоја розова иднина и капацитет за некој поголем раст. Потребни се услови за компаниите чисто да дишат и слободно да работат, да инвестираат, а со тоа да можат да обезбедат повисоки плати“, вели Бошков.
Блумберг Адрија
За стопанството да може да генерира повисоки плати за вработените, според него, неопходни се системски промени за поддршка на бизнис-секторот, создавање услови за инвестиции, како и предвидливост во работењето.
Блумберг Адрија
„Економијата во Македонија сè уште е зависна од политиката и низата ограничувања со кои државата се меша во слободната економија. Тоа е цел еден систем на пречки, бавноприфаќање на транзицијата и практикување на демократијата и дијалогот. Потребен е слух од бизнис-заедницата и невладиниот сектор за да може да имаме економска слобода. Работодавците мора да се сигурни дека нема да се соочуваат со изненадувања - даночни, законски итн. и дека нема постојано во главен фокус да бидат политичарите наместо стопанството и граѓаните“, вели Бошков.
Инаку, од аналитичкиот тим на „Блумберг Адрија“ очекуваат дека во 2024 година ќе продолжи растот на платите, иако со малку пониски стапки во споредба со претходните години.
Според аналитичарите, годинешните избори во Хрватска и во Македонија се очекува дополнително да придонесат за растот на платите, при што владите веројатно ќе понудат повисоки плати во јавниот сектор.
