Централните банки на Инстаграм - чудно, нели?

Централните банки се како самовилата на забите: нивните политики функционираат само ако јавноста верува во нив. Таа доверба неодамна беше уништена од инфлаторната криза, за време на која луѓето во многу земји се чувствуваа како да легнале со заб под перницата, а се разбудиле не со подарок, туку со уште помалку заби. Затоа, за да ја обноват довербата, особено кај помладите генерации, кои не ги почувствувале многу придобивките од монетарната политика, Федералните резерви (Фед), Европската централна банка (ЕЦБ), Банката на Англија и други се обидуваат да се вклучат во маркетинг-кампањи и да го шират влијанието преку социјалните мрежи.

Централните банки разбираат дека генерацијата зед и милениумците најчесто ги добиваат своите информации преку социјалните медиуми и немаат многу трпение за неразбирливи говори полни со разговори за основни точки и секундарни ефекти. Затоа околу сто централни банки одлучија да отворат профили на Инстаграм: до декември 2023 година (последни достапни податоци) тој број се зголеми за повеќе од една третина во споредба со пред две години, според податоците од Директориумот на централната банка, годишен водич за централните банки. „Ако вие не го обликувате вашиот наратив таму, некој друг ќе го направи тоа“, вели Мајкл Мекмахон, макроекономист на Универзитетот во Оксфорд, кој ги советува централните банки за прашања од областа на комуникациите.

Банките се решија на овој чекор со цел, меѓу другото, да управуваат со својата репутација и да се борат со невистините на интернет. Претседателот на Фед, Џером Пауел, често е предмет на дезинформации или потсмев на социјалните мрежи, што може да придонесе за ширење теории на заговор дека централните банки ги зголемуваат каматните стапки само затоа што сакаат да нанесуваат болка. Во видео на Инстаграм, кое им се допаднало на повеќе од милион луѓе, Пауел е прикажан како наводно ги крши пазарите кога вели „добро утро“. Во видео на Тикток, со милион прегледи, неговиот глас е монтиран за да звучи како да вели: „Бог да ја благослови мојата машина за печатење пари“.

Некои обиди на централните банки да допрат до младите преку социјалните мрежи се за пофалба, додека други предизвикуваат чувство на срам. Банките сакаат да објавуваат за историјата и дизајнот на националните монети и банкноти. Инстаграм-профилот на Фед е претежно полн со предупредувања за измами.

Централната банка на Бразил го промовира својот многу успешен систем за инстант плаќање што го користат милиони потрошувачи. Во пресрет на Европското фудбалско првенство во 2024 година, Националната банка на Романија објави видео од своите вработени како играат фудбал на мермерниот под на банката. Банката на Канада споделува видеодневници на своите лидери што патуваат низ земјата, со нарација што поради некоја причина звучи како да е генерирана со помош на вештачка интелигенција.

Германската Бундесбанка организира годишен настан за помлади од 30 години, каде што инфлуенсерите интервјуираат официјални лица. На последниот собир беше организирана сесија со наслов „Можете да го користите вашето евро кога и каде сакате? Дигиталните пари на иднината“. На настанот одржан во 2023 година, гувернерката на ЕЦБ, Кристин Лагард, откри дека дури и нејзиниот син изгубил пари на криптовалути. Во објава на својот профил, Лагард го објасни намалувањето на каматните стапки со фотографија на која носи златен ѓердан на кој пишува „надлежна“ со коси типографски, печатарски букви.

Alex Kraus/Bloomberg

Централните банкари се главно многу добро платени експерти што не биле избрани на функција, но нивните одлуки, на мистериозен начин, влијаат врз животите на луѓето. Тие, сепак, треба да учествуваат во некаков натпревар за популарност на 21 век, во кој инфлуенсерите се во првите редови.

За да го направи својот персонал попристапен, ЕЦБ објавува снимки од „тим билдинг“ на Инстаграм - снимки од оние што одлучуваат за клучните каматни стапки како влегуваат во зградата пред клучните состаноци, сето тоа придружено со оптимистичка музика. Видео на Банката на Англија покажува директори како се собираат за групна фотографија во амбиент што дефинитивно не е за генерацијата зед – пространа сала со ѕидови во боја на ф’стаци и позлатени столбови.

Нивниот опсег на социјалните мрежи сè уште е само мал дел од опсегот на медиумските суперѕвезди. Банката на федерални резерви, чии одлуки можат да предизвикаат големи промени на глобалните пазари во вредност од трилиони долари, има околу 200.000 следбеници на Инстаграм, во споредба со 649 милиони за фудбалерот Кристијано Роналдо (кој има најмногу следбеници на платформата) или 3,6 милиони за Роберт Кијосаки, автор на серијата книги за лични финансии „Богат татко, сиромашен татко“.

Најследена е Банката на Венецуела, со 1,9 милион следбеници, иако главно ја објавува само курсната листа. (Луѓето на Инстаграм сакаат драма.) Индонезија е на второто место, со околу милион следбеници што ги нарекува „пријатели на рупијата“. Лагард, една од ретките лидери на централната банка со јавен личен профил на Инстаграм, има 181.000 следбеници - над двојно повеќе од оној на ЕЦБ.

Кога станува збор за објаснување на одлуките за каматните стапки и состојбата на економијата на Инстаграм, најснаодливите централни банки им ги препуштаат уздите на помладите кадри, вели Андре Спајсер, декан на бизнис-школата „Бејс“ во Лондон. Луѓето имаат тенденција да им веруваат на своите врсници и полесно е да се разбере монетарната политика или инфлацијата кога тоа е објаснето од некој што зборува како вас и вметнува познати културни референци. „Ангажирањето на некој со кого публиката може да се идентификува, како млад човек, може да биде ефективна техника“, вели тој.

Сакари Суонинен, шеф на тимот за дигитална содржина на ЕЦБ, вели дека неговите колеги од генерацијата зед често доаѓаат со идеи за инстаграм-профилот на банката. „Тие велат: ‘Еј, го видов ова, тоа може да успее и кај нас’. Многу се потпираме на нив“, вели тој.

Во видеото на ЕЦБ инспирирано од мемињата на Тикток со припадници на бебибумери (генерација луѓе што се родени по Втората светска војна), кои читаат текстови напишани од зумери, една средовечна жена вели на англиски со изразен француски акцент: „Симболот на еврото? Легенда. Издоминира“.

Во годинашното соопштение за Денот на вљубените, покрај симболот на еврото направен од чоколатца во форма на срце, пишуваше: „Розите се црвени, темјанушките се сини, инфлацијата е на пат да се стабилизира на 2“. (пародија на традиционална љубовна песна; во англиската верзија има рима, а бројот два се однесува на стапката на инфлација, забелешка на преведувачот).

Банката на Јамајка ги има можеби највеселите содржини од сите. Нејзините видеа на Инстаграм прикажуваат луѓе како танцуваат на концерти на реге-бендови, кои се одржуваат еднаш месечно во седиштето на банката за време на паузите за ручек. Банката дури нарачала песни инспирирани од монетарната политика од локални уметници. „Не сакаме да бидеш премногу висока, не сакаме да бидеш премногу ниска“, пее пејачката со сладок глас. „Кога инфлацијата е стабилна и предвидлива, тоа е вистинската работа“.

Во моментов нема коментари за веста. Биди прв да коментира...

Остави коментар