Кога робот ќе ви зготви вечера и ќе помине со правосмукалка

Расте увереноста дека раната доба на вештачката интелигенција (ВИ) значи дека конечно доаѓаат хуманоидни роботи. „Хуманоидните роботи со децении се застапени во популарната култура. Се разбира, сега научниците сакаат да го направат тоа реалност“, вели Шахин Фаршчи, партнер во „Лукс капитал“ (Lux Capital), фирма за ризичен капитал фокусирана на нови технологии. „Со секоја технолошка револуција доаѓа уште еден обид да се доближиме до роботот Рози“, додава тој, мислејќи на помошничката во култната анимирана футуристичка серија „Џетсонови“ (The Jetsons).

Роботите стануваат сè почести и помоќни во последниве години, но најуспешните примери не личат баш на дроидите од „Војна на ѕвездите“. Правосмукалките „румба“ (Roomba) од „Ајробот“ (IRobot Corp.) и роботите „Кива“ (Kiva), кои помагаат во управувањето со магацините на „Амазон“ (Amazon.com), претставуваат значителен технички напредок, но повеќе се автоматизирани уреди отколку хуманоиди со вештачка интелигенција.

Everett Collection Џетсонови: Џејн Џетсон и роботот Рози

Обидите да се задоволи гладот на јавноста за поперсонализирани роботи често завршуваа со разочарување. Кога Илон Маск ги откри плановите на „Тесла“ (Tesla) за хуманоиден робот во 2021 година, јавноста беше незадоволна. Тоа не беше демонстрација на нова технологија, напротив. Наместо тоа, на сцената танцуваше маж облечен во бел тесен роботски костим со црн шлем, изложувајќи го Маск на потсмев. Но луѓето што работат на ова поле велат дека неодамнешниот напредок во моделите за вештачка интелигенција и софтверот што може да ги претвори фотографиите и видеата во смислени информации значи дека роботите што физички личат на луѓе наскоро би можеле да станат реалност. Хуманоидните роботи што можат да извршуваат повеќе задачи - за разлика од роботската рака, која вешто повторува една функција во фабрика - би можеле да бидат особено корисни.

Финансиската клима и натаму е брутална: фирмите за ризичен капитал инвестираа помалку во стартапи во 2023 година отколку во која било година од 2019-та наваму, а компаниите за хуманоидни роботи собраа само една четвртина од капиталот што го привлекоа во 2018 година. Меѓутоа, бројот на зделки нагло се зголеми, што сугерира дека инвеститорите сè уште се возбудени околу целата приказна и склони да им дадат доверба на таквите стартапи.

На почетокот на овој месец инкубаторот и инвеститор во рана фаза „Уај комбинејтор“ (Y Combinator) додаде роботика и машинско учење во својата листа на области на интерес. Дијана Ху, партнерка во инкубаторот, смета дека на стартапите им станува поевтино и полесно да градат напредни роботи. „Конечно е можно да се направат роботи со човечка перцепција“, вели Ху.

1X Technologies Од „Уан екс“ велат дека нивниот двоножен хуманоиден прототип на робот може да оди, да држи предмети и да комуницира со изрази на лицето

„Блумберг њуз“ на 23 февруари објави дека стартапот за хуманоидни роботи „Фигјур еј-ај“ (Figure AI) собрал околу 675 милиони долари во круг на финансирање, а Џеф Безос, „Енвидија“ (Nvidia) и други инвеститори ја проценуваат неговата вредност на околу две милијарди долари. Компанијата соопшти дека се надева оти нејзиниот производ ќе може да извршува задачи што се опасни за луѓето или оние за кои нема доволно работна сила, вклучувајќи ги и работните места во магацините. Норвешката стартап-компанија за роботи „Уан екс“ (1X Technologies) собра 100 милиони долари претходно годинава, а „Опен еј-ај“ (OpenAI), креаторот на ЧетГПТ (ChatGPT), е инвеститор во двете компании.

„Амазон“, кој го преобликува начинот на кој роботиката се користи во логистиката со купувањето на „Кива системс“ (Kiva Systems) во 2012 година, започна со тестирање двоножни роботи направени од „Агилити роботикс“ (Agility Robotics), стартап што го поддржаа во 2022 година. Хуманоидната машина, со светлечки бели очи и лопатки наместо раце, е конфигурирана да зема канти од полица и да ги носи на подвижна лента. „Агилити“ планира нова фабрика за зголемување на производството; работи на развој на роботи што на крајот би можеле да преминат на компликувани задачи како што се истовар на камиони и преместување палети.

Фаршчи од „Лукс капитал“ вели дека статистичките податоци за собирани средства не го опфаќаат целосниот обем на растот на роботиката. „Повеќе претприемачи се фокусирани на тоа“, вели тој, но многумина сè уште не ги објавиле своите амбиции или колку пари собрале од инвеститорите. „Оние похрабри компании лансирани минатата година, очекувам да соберат многу, многу милијарди долари“, вели Фаршчи. „Тие буквално клокотат од под површината“.

Во моментов нема коментари за веста. Биди прв да коментира...

Остави коментар