Научната фантастика станува реалност: Стартап развива мозок за роботи

Уште од најраните научнофантастични книги и филмови, компјутерите со вештачка интелигенција речиси секогаш биле придружени со еднакво паметни машини за движење, како андроиди и други роботи. Меѓутоа, во текот на изминатите 15 години, системите за вештачка интелигенција што работат целосно во софтвер станаа многу пософистицирани од нивните движечки колеги. Роботите можат да градат автомобили во фабрики и да чистат низ дома, но се способни да извршуваат релативно мал опсег на задачи во споредба со четботовите.

Стартапот наречен „Физикал интелиџенс“ се обидува да ја промени оваа ситуација. Формирана годинава од тим експерти за роботика и вештачка интелигенција, компанијата планира да создаде софтвер што може да додаде интелигенција на високо ниво во широк спектар на роботи и машини. Или како што вели соосновачот и главен извршен директор Карол Хаусман во првото јавно интервју од основањето на компанијата: „Ние имаме цел да ја донесеме вештачката интелигенција во физичкиот свет со универзален модел што ќе може да го напојува секој робот или кој било физички уред без оглед на апликацијата“.

Подемот на вештачката интелигенција за обработка на јазици изградена од „Опен еј-ај“ (OpenAI), „Гугл“ (Google) и другите е овозможен од огромниот обем на текст достапен на интернет и во други архиви. Компаниите можат да ги обучуваат своите модели со вештачка интелигенција така што им даваат милијарди примери за тоа како луѓето користат зборови, процес што им помогна на компјутерите математички да го „решат“ јазикот. Собирањето слични количества податоци од физичкиот свет се покажа како многу попредизвикувачки, ограничувајќи го напредокот на вештачката интелигенција во полето на роботиката.

Тезата на „Физикал интелиџенс“ е дека сега е вистинско време за нов пристап кон градење модели на роботска вештачка интелигенција. Компанијата сака да ги спои техниките што се користат за изградба на јазични модели со сопствените техники за контролирање и инструкции на машините. Крајната цел би била да се создаде вештачка интелигенција што работи како тип на роботски систем за општа намена.

Хаусман ги помина последните неколку години како научник за роботика во „Гугл“. Меѓу неговите колеги соосновачи се Сергеј Левин, кој има направено пионерска работа во роботиката како професор на  Универзитетот во Калифорнија, Беркли, Челзи Фин, професор на Универзитетот „Стенфорд“, Брајан Ихтер, поранешен научник за истражување во „Гугл“, и Лачи Грум, поранешен извршен директор во платежната компанија „Страјп“ (Stripe) и истакнат технолошки инвеститор. Нивната компанија собра 70 милиони долари од „Трајв капитал“ (Thrive Capital), „Опен еј-ај“, „Секвоја капитал“, „Гриноакс капитал партнерс“ (Greenoaks Capital Partners), „Лукс капитал“ (Lux Capital) и „Косла венчурс“ (Khosla Ventures).

Напорите за подобрување на софтверот што ги напојува роботите траат со децении. Имено, компанијата наречена „Вилоу гараж“ (Willow Garage), формирана во 2006 година, помина неколку години обидувајќи се да изгради тип на софтвер за општа намена што би можел да се сподели меѓу роботите и да им даде унифициран сет на основни функции. Додека нејзиниот софтвер беше купен од голем број компании и развивачи на роботика, работата на „Вилоу гараж“ не доведе до огромен скок напред во роботската интелигенција и компанијата ги прекина своите операции во 2014 година.

Други компании, како „Ритинк роботикс“ (Rethink Robotics), се обидоа да изградат системи што би можеле да научат да вршат работи со копирање на движењата што им ги покажуваат луѓето. Голем број стартапи неодамна имплементираа вештачка интелигенција што користи повторување за да ги научи роботските раце да земаат предмети и да извршуваат задачи слични на оние што ги прават луѓето во магацините. Други почнаа да градат андроиди дизајнирани да имитираат човечки движења. Еден од овие стартапи, „Фигјур еј-ај“ (Figure AI Inc.) штотуку собра 675 милиони долари од „Опен еј-ај“, „Енвидија“ (Nvidia), Џеф Безос и „Мајкрософт“, кои треба да ѝ помогнат да направи роботи за работа во логистички и производствени капацитети.

Наместо да се фокусира на специфични типови на роботски раце или индустриски андроиди, „Физикал интелиџенс“ сака да развие софтвер што може да се примени на многу видови роботи. За да го направи тоа, започна да работи на создавање сопствен модел со вештачка интелигенција дизајниран да ги вгради основните човечки способности кај машините. „Мислам дека е навистина кул тоа што луѓето го градат со хуманоиди“, вели Грум. „Но она што во основа ги прави луѓето интересни е мозокот, а не нашиот хардвер. Ние сме крајните генералисти“.

Во текот на изминатите неколку години истражувачите објавија низа трудови што покажуваат дека роботите веќе стекнуваат нови нивоа на интелигенција од моделите на вештачка интелигенција базирани на јазик и слика. Ако, на пример, ѝ кажете на роботската рака да врзе чевел, таа може да користи вештачка интелигенција за да ги пронајде основните концепти на чевли и врвки за чевли и информации за тоа што обично подразбира врзувањето на чевлите. Иако ова е добар почеток, на хардверот за роботика сè уште му треба одредено ниво на обука за реално да ги исполни физичките задачи. Ова беше голем предизвик, бидејќи потребата роботите да ги извршуваат задачите доволно пати за да ја научат секоја нова работа одзема време и е скапа.

„Физикал интелиџенс“ допрва треба да открие како точно планира да го надмине овој проблем. Соосновачите на компанијата велат дека нема да градат сопствен хардвер, туку ќе купат различни роботи и ќе ги обучуваат нивните модели со вештачка интелигенција на тој хардвер. Целта е да се соберат најголемите податоци за роботика создадени досега.

Компанијата се соочува со конкуренција од компании како „Фигјур еј-ај“ и „Тесла“, кои произведуваат андроиди, како и од други компании што работат на софтвер за роботика за општа намена. На почетокот на неделава, на пример, седумгодишниот стартап „Коваријант“ (Covariant) соопшти дека развива нов тип на модел на роботика што го отсликува напредокот на вештачката интелигенција базирана на јазикот, сликите и видеата за да ги подобри способностите на роботските раце.

Соосновачите на „Физикал интелиџенс“ тврдат дека со години работат на предизвиците на вештачката интелигенција за роботиката и дека развиле нови пристапи за прашања што ги забавиле другите во оваа област. „Реално, мислам дека ќе ни треба долг и многу сериозен напор за истражување за да се случи тоа“, вели Левин. „Но има доволно знаци дека најголемите пречки за користење на роботите во реалниот свет сега се решливи“.

Во моментов нема коментари за веста. Биди прв да коментира...

Остави коментар