Одгледувачите ги изложуваат своето овошје и зеленчук за потрошувачите, но не на пазар, туку на Тикток. Сѐ започна со видео со рецепт за печени тестенини со фета-сирење, кое во јануари 2021 година се појави на Тикток и стана вирално на платформата. Во видеото, домашниот готвач аматер пече тестенини со шери-домати, маслиново масло и фета, а потоа додава зачини. Рецептот стана вирален како на интернет, така и во трговијата.
Според податоците на „Интернешнел фреш продјус асосиејшн“ (ИФПА - International Fresh Produce Association), продажбата на шери-домати таа недела порасна за околу 29 проценти. И медиумските куќи на големо известуваа дека фета-сирењето е тешко да се набави. Денес, ознаката за печена фета, #bakedfeta, има 127,7 милиони прегледи.
Со оглед на тоа дека младите генерации купуваат многу производи онлајн преку друштвените мрежи, вклучувајќи и храна, производителите гледаат можност своите производи да ѝ ги доведат буквално на дофат на новата генерација. Тие користат социјални медиуми и влијателни личности за да ги натераат луѓето да купуваат свежа храна.
Прочитај повеќе
Едно евро за 5 клика на фејсбук: А кои наши компании се тиктокери?
Македонските компании кои се присутни на Тик Ток имаат помалку од 10.000 следбеници
15.09.2022
„Мора да им излеземе во пресрет на потрошувачите таму каде што се. Милениумците сега се многу големи купувачи и продолжуваат да влијаат на економијата. Друштвените медиуми и натаму имаат неискористен потенцијал за нашите производи“, вели Кејти Брнз, главна извршна директорка на Меѓународното здружение за свежи производи.
Има сѐ повеќе докази дека со вистински потег, и скромните жита може да привлечат внимание. Ова лето пченката ја виде светлината на социјалните мрежи благодарение на дете, кое интернет-обожавателите го нарекуваа „пченкар“.
„Откако ми кажаа за пченката, пробав со путер и сѐ се промени“, рече момчето во видеото.
„Социјалните медиуми се доста евтин пат до пазарот, што претставува вистинска можност за индустријата“, рече Брнз. „Ако можете да погодите на големо, како момчето со пченката, ќе добиете голема предност“, рече Брнз. Една од компаниите што таа ги забележа е „Вондерфул компани“ (The Wonderful Company), со седиште во Лос Анџелес, која во своите реклами за ф'стаци прикажуваше славни личности. Компанијата одгледува и продава различни прехранбени производи, вклучувајќи и овошје, јаткасти плодови, цвеќиња, вода, вино и сокови. Сега спроведува ново и посветено вложување во Тикток преку многу свои марки производи. Интерната агенција за рекламирање на компанијата има дури и експерти за Тикток.
„Влијанието на Тикток е неспорно во допирање до младата публика. Инвестирањето во Тикток ни овозможува да се поврземе со милениумците на забавен и автентичен начин, што не можеме да го добиеме преку традиционалното телевизиско или печатено рекламирање. Тоа овозможува ангажман, интеракција и разновидност на содржините, така што за секого има по нешто на начин и во момент кога традиционалните временски рокови на рекламирање допуштаат“, рече Адам Купер, потпретседател за маркетинг во компанијата.
„Вондерфул компани“ работи со влијателни личности за своите брендови. Тие бараат луѓе што навистина ги сакаат производите и здравите грицки.
„Како компанија, горди сме на тоа што сме иновативни во начинот на кој ги пласираме своите производи, а Тикток е следниот простор за развој на марките на производи“, рече Купер.
Еден од првите партнери за брендот на компанијата „Вондерфул Халос“ (Wonderful Halos), која продава мандарини, е @greyandmama, профил што го води Линда Микер, која стекна популарност на социјалните мрежи преку споделување видеа од својот син Греј како учи да го изговори зборот благодарам. Таа напиша и книга за здрава исхрана за мали деца.
„Многу се слатки и се супервкусни“, вели дете додека пробува мандарина во платеното видео. Компанијата моментално не планира да ги продава своите производи на Тикток. Наместо тоа, целта е да изгради љубов и приврзаност кон својата стоковна марка и да ги привлече луѓето во продавниците да обратат внимание на нивните производи кога ќе купуваат производи преку интернет.
Тикток може да биде посебна помош за локалните фарми. За малата фарма „Лонли пајнс“ (Lonely Pines), каде што се одгледуваат цвеќиња и лук, а која се наоѓа на Олимпискиот полуостров, социјалните медиуми се клучен дел во работењето. Лаура Шлецбаум и нејзиниот сопруг Џери Бергстром собраа над 3,5 милиони лајкови на Тикток и илјадници пријатели на Инстаграм и Јутјуб. Тикток им помогна да дојдат до нови купувачи, млади градинари.
„Целосно ги вклучивме социјалните мрежи во нашиот деловен план. Инстаграм е главен извор за нашите локални купувачи, овозможувајќи им да купуваат цвеќиња и лук директно од нас, додека Тикток нѐ претставува на една цела нова генерација градинари. Реално можеби нема ни да нѐ пронајдат ако нѐ нема на социјалните мрежи“, рече Шлецбаум.
.webp){kind=icon}
Во моментов нема коментари за веста. Биди прв да коментира...