.webp){kind=icon}
Компанија на поранешниот американски претседател Доналд Трамп е прогласена за виновна за даночно затајување во период подолг од една деценија, бидејќи извршните директори, вклучително и поранешниот главен финансиски директор, Ален Вајселберг, избегнувале да плаќаат даноци за дополнителни бенефиции што им ги обезбедувала компанијата, како бесплатни станови и луксузни автомобили.
Ова е прв случај на кривична пресуда за една од компаниите на Трамп, а одлуката доаѓа во време кога поранешниот претседател се кандидира за втор мандат. Одлуката, исто така, доаѓа кога Трамп се соочува со голем број други правни проблеми, вклучително и кривични истраги за неговото ракување со доверливи документи и неговиот обид со поддршка на своите поддржувачи да направи пресврт во изборите од 2020 година.
По едномесечно судење, поротата во вторникот донесе пресуда со која се осудени Trump Corp. и Trump Payroll Corp, две фирми под чадорот на Trump Organization. За време на судењето, обвинителите од канцеларијата на окружниот обвинител за Менхетн, Алвин Брег, покажаа дека во текот на 13 години, директорите на Трамп често ги прикажувале бонусите за одмор како надомест за консултации и дека на внуците на Вајселберг дури им била платена школарина во приватно училиште.
Eva Marie Uzcategui/Bloomberg
Лично Трамп не беше обвинет.
Финансиската казна најверојатно ќе биде околу 1,6 милиони долари, но последиците за Trump Organization би можеле да бидат поголеми. На пример, во иднина компанијата може да има проблеми со склучување на нови зделки.
„Компанијата се соочува со 'куп нематеријални' проблеми“, рече Бенет Гершман, професор на Правниот факултет на Универзитетот Пејс. „На компанијата-чадор би можело да ѝ се забрани да склучува договори со државните агенции, а исто така може да ѝ биде тешко да работи со банките“, објасни Гершман во интервју пред објавувањето на пресудата. „Ова е голема работа“, додаде тој.
Пресудата е кулминација на тригодишната истрага за Трамп и неговите деловни практики од страна на канцеларијата на обвинителката на државата Њујорк, Летиција Џејмс.
Граѓанска парница
Ова е единствената кривична постапка што произлезе од истрагата, но уште не е завршена. Брег во понеделникот изјави дека го ангажирал Метју Коланџело, поранешен вработен во Министерството за правда, познат по тоа што се спротивставува на Трамп и неговата компанија, за да се фокусира на најважните делови од истрагата.
Во меѓувреме, Џејмс поднесе граѓанска тужба од 250 милиони долари против Trump Organization. Таа тврди дека Трамп и неговите три деца ја прецениле вредноста на имотот на компанијата и бара казна што ќе вклучува забрана за нив четворица да управуваат со какви било компании во сојузната држава.
Покрај тоа, Трамп е предмет на кривични истраги за обиди од него и неговите поддржувачи да ги поништат резултатите од претседателските избори во 2020 година, како и за ракување со доверлива владина документација во неговата вила Мар-а-Лаго на Флорида.
Gabby Jones/Bloomberg
Трамп ги нарече истрагите и судските процеси неоснована политичка одмазда. Во порака на социјалната мрежа Truth Social минатата недела, додека судењето за Trump Organization се приближуваше кон крајот, тој напиша: „немаше никаква корист за 'Trump'“ и „навистина немавме поим“.
Обвинителите тврдеа дека Вајселберг и Џефри МекКони, уште еден извршен директор на Trump Organization, биле „високи директори“ кои дејствувале во име на компаниите. Одбраната тврдеше дека менаџерите мамеле само за сопствено збогатување и дека двете компании, Трамп и неговото семејство не знаеле ништо за тоа.
Судењето даде ретка можност за увид во внатрешното работење на компанијата на Трамп. Поротниците забележаа дека Вајселберг и другите извршни директори, вклучително и генералниот советник и главниот оперативен директор на фирмата, добивале значителен дел од нивната годишна плата во форма на бенефиции, без данок. За време на неговото сведочење, МекКони рече дека работењето функционирало така додека Трамп не станал претседател во 2017 година.
