.webp){kind=icon}
Американската министерка за трговија Џина Раимондо ги повика европските влади да соработуваат со САД во борбата против климатските промени и да се спротивстават на кинеското влијание, што е најнов знак дека Вашингтон се надева дека сојузниците ќе го следат нивното водство во усвојувањето на историски значајниот закон за климата.
Усвојувањето на Законот за намалување на инфлацијата во САД ги разбесни европските лидери, кои се пожалија дека тоа е неправедна субвенција. Администрацијата на Бајден се обиде да ја смири таа лутина сигнализирајќи дека Европа треба да им конкурира наместо да започне трговска борба.
„Треба да работиме заедно и мислам дека без разлика дали станува збор за иницијативата за законот за клима, тој за намалување на инфлацијата или за чипови, има можности за европските компании и можности за нас да работиме заедно за да бидеме подготвени за климатските промени и нашата глобална конкуренција со Кина. Значи, можеби првично чувствата се повредени, но може многу добро да се дејствува заеднички“, рече синоќа Раимондо за телевизијата „Блумберг“.
Раимондо рече дека нејзината советничка за економија ќе замине во Кина, откако минатиот месец најави дека планира да го испрати својот тим во таа земја.
Раимондо зборуваше по објавата на најновите податоци за работните места во САД, кои беа во согласност со процените, а претставуваат мешан резултат, бидејќи Федералните резерви (ФЕД) мерат колку високо да ги поттикнат стапките. Таа рече дека пристапот на САД кон Кина е да ги заштити американската технологија и националната безбедност, истовремено промовирајќи го извозот на одредени стоки. Таа рече дека САД не сакаат да ги прават сите полупроводнички чипови на своја територија, но мора помалку да се потпираат и да зависат од Азија.
„Никој не мисли дека треба да правиме сè што ни треба во Америка. Но фактот што купуваме повеќе од 90 проценти од нашите врвни чипови од Тајван е неодржлив и, искрено, речиси опасен“, рече таа.
Раимондо пофали еден од предлозите, Законот за ограничување, опишувајќи го како одличен и многу разумен. Нацрт-законот има цел да ги зајакне овластувањата за справување со заканите од странска технологија, за што Раимондо рече дека е подобар пристап отколку фокусирање на кој било ентитет, како што е апликацијата за споделување видеа во кинеска сопственост Тикток (TikTok).
„Мислам дека не треба да влеземе во опкружување на лов на вештерки, каде што ќе ги следиме поединечните компании една по една“, рече таа.
