Лажна фотографија од експлозија во близината на Пентагон широко се распространи на социјалните мрежи во понеделникот наутро, што накратко ги насочи акциите во САД кон пониско ниво, во веројатно првиот пример на слика генерирана од вештачка интелигенција (ВИ) што го размрда пазарот.
Нешто по 10 часот по њујоршко време, кога проциркулира фотографијата, индексот S&P 500 падна за околу 0,3 отсто, на најниско ниво во сесијата. Откако се појавија вести дека сликата е лажна, индексот брзо се врати.
На лажната фотографија, која првпат се појави на Фејсбук, се гледа голем облак од чад за кој корисник на платформата тврдел дека е во близината на седиштето на американската војска во Вирџинија.
Наскоро се прошири и по профили на Твитер со милиони следбеници, вклучувајќи ги и руската државна информативна мрежа РТ (RT) и сајтот за финансиски вести „Зирохеџ“ (ZeroHedge), кој е вклучен во новиот систем за верификација на платформата, „Твитер блу“ (Twitter Blue).
Дежурен офицер во Пентагон во електронска пошта до „Блумберг“ посочил дека нема пријавени инциденти во понеделникот наутро. Полициската управа во Арлингтон исто така се огласи на Твитер:
„Нема експлозија или инцидент што се случил во Пентагон или во неговата близина и нема непосредна опасност за јавноста“.
Пред официјалните извори да ги побијат фотографијата и профилите на Твитер што ја шират, луѓе посочија дека сликата можеби е генерирана од вештачка интелигенција.
Ник Вотерс од истражувачката група „Белингкет“ (Bellingcat) во интервју рече дека „шокот“ од шпекулациите за експлозија во близината на Пентагон го навел да ја прегледа фотографијата.
„Проверете ги предната страна на зградата и начинот на кој оградата се спојува во бариерите“, напиша тој на Твитер. „Исто така нема други слики, видеа или луѓе што објавуваат слична содржина како сведоци од самото место“.
Како што стана јасно дека фотографијата е лажна, налозите на „Твитер“ одговорни за нејзино ширење почнаа да ги бришат твитовите или да објавуваат корекции. РТ и „Зирохеџ“ ги избришаа твитовите со сликата, а „Зирохеџ“ посочи дека фотографијата е потврдена како лажна. Платениот налог на „Твитер“ наречен „Блумберг фид“ (Bloomberg Feed) кој исто така ја објави фотографијата беше суспендиран во понеделникот наутро.
Портпаролот на „Блумберг њуз“ (Bloomberg News) соопшти дека „Блумберг фид“ (Bloomberg Feed) и твитер налогот наречен „Волтер Блумберг“ (Walter Bloomberg), кој исто така ја пренесе објавата, не се поврзани со „Блумберг њуз“.
Иако потеклото на сликата останува нејасно, шпекулациите оти е генерирана од вештачка интелигенција ја продлабочија загриженоста дека новите технологии што го олеснуваат создавањето слики и друга содржина ќе го забрзаат ширењето на дезинформации.
.webp){kind=icon}
