.webp){kind=icon}
Во земјава само годинава се увезени пет „мерцедеси“ слични на тој што го вози словенечката НБА-ѕвезда Лука Дончиќ. Сопствениците на овие пет возила платиле вкупно над милион и 100 илјади евра за задоволството.
Но, каде ги возат? Сакале-нејќеле, на македонските патишта што се градат толку долго што дури и странските инвеститори решија да протестираат. Германците од „Кромберг и Шуберт“ во Битола најавија и блокада на патот кон граничниот премин Меџитлија. Им загинал работник поради тоа што делницата на која се работи не е обележана, што ја прави и опасна, а е исклучително фреквентна.
Државата, пак, не се задолжува само за патишта. Следното задолжување ќе биде за енергетски ефикасни проекти. Најновата обврзница што ќе ја емитува Министерството за финансии е зелена, на износ од 10 милиони евра. И тоа не е сè. Министерот Бесими најави уште една граѓанска обврзница на истиот износ, ама ако има поголем интерес, може и повеќе.
Каматата што купувачите на обврзниците што ги емитува државата ќе ја добијат е пониска од каматата што домаќинствата им ја плаќаат на домашните банки за да земат станбен кредит. Просечната камата надмина шест отсто и, од земјите во регионот, повисока е само во Србија. Растот на каматите не дејствуваше на пад на цените на становите, иако нашата анкета покажа дека се намалува и интересот за купување станови поради високите цени.
А државата тргна во борба со високите цени. По храната, поевтинија и пијалаците, а се затвораат и маркети што манипулирале со цените. Но, производителите се плашат дека цените ќе паднат, ама ќе снема и производи на пазарот. Меѓународните институции, пак, предупредуваат дека, и покрај владините мерки, куповната моќ се намалува и потрошувачката паѓа, што е главната причина за килавиот раст на БДП годинава.
Прогнозите на меѓународните експерти почнуваат да се остваруваат и кога станува збор за цената на нафтата. Предвидувањето за 100 долари за барел нафта брент станува сè поостварливо затоа што побарувачката расте во услови на намалено производство на Саудиска Арабија и Русија.
Зимата уште непочната станува неизвесна, но има и добра вест. Заврши штрајкот на сценаристите во Холивуд. Барем ќе гледаме серии додека надвор е ладно.
