.webp){kind=icon}
Народната банка (НБМ) треба малку посериозно да се зафати со проектот за финансиска едукација. Наместо да ги обучуваат само децата од основните училишта, треба своите сили да ги насочат и кон Владата. Децата знаат и со апликации и со пари, ама неделава покажа дека министрите имаат проблем.
Никој од нив не знае колку плата зел откако одлучија да си ја покачат за 78 отсто. Министерот Спасовски не проверил, вицепремиерот Груби знае само дека зел помалку од премиерот и помалку од тоа што земал на претходното работно место, министерот Николовски си ги загубил картичките во Брисел и сега нема како да провери...
Затоа НБМ треба да посвети поголемо внимание на ова, да ја зголеми свесноста за користење апликации и со тоа ќе влијае и на развојот на финтек-индустријата, по која земјава е најлошо рангирана во регионот.
Depositphots
Владините претставници можеби не знаат колку плата зеле, ама знаат колку паднале цените откако презеле мерки за намалување на инфлацијата. Министерот Бектеши рече дека сега јадеме најевтина храна и трошиме најевтини горива во регионот. И рече дека и натаму ќе има казни за трговците што не обезбедуваат доволни количества од производите со замрзнати цени. Трговците го потсетија дека тие не можат да продаваат нешто што го немаат во ситуација кога нивните партнери не им го доставуваат.
По прашањето со инфлацијата, неделава се огласи и статистика. Според нивните пресметки, со сите владини мерки, за еден месец храната поевтинила за 0,3 отсто. НБРМ не е задоволна од темпото со кое паѓаат цените, па уште еднаш ја зголеми каматата. И како резултат на сето тоа, нашите аналитичари прогнозираат дека потрошувачката на домаќинствата ќе стагнира.
Не паѓаат ниту цените на становите. Ќе има мало намалување до крајот на годината, но вистинско ладење на пазарот како во Западна Европа нема да се случи, главно поради политиките на државата, велат бизнисмените од секторот.
Тие што немаат проблем со платите и цените можат да си дозволат и да се пофалат со тоа што го имаат. Па, ги прашавме какви автомобили возат нашите бизнисмени, но и оние во регионот. Возниот парк е импресивен. „Блумберг бизнисвик Адрија“ анализираше и кои се најбогатите луѓе во регионот и зошто за нив се снимаат и телевизиски серии.
BMW, Kocho Angjusev
САД имаат проблем со буџетот. Министерката за финансии предупредува дека ако не се зголеми прагот за задолжување, ќе биде загрозена националната безбедност. Кај нас нема проблеми со зголемувањето на прагот. Налето државата ќе се задолжува и кај граѓаните и сите ќе имаат ќар од тоа. Словенците, пак, би се задолжувале во Јапонија, во самурајски обврзници, а анализиравме и како живеат Грците по кризата со големите долгови.
Од добрите вести, издвојуваме – Македонија доби берза на струја, а ќе ги фати и европските трендови и ќе воведе данок на јаглерод за да се намали загадувањето.
