Овој ден ќе го запаметиме по тоа што денеска, во 10.35 часот, за првпат се затвори портата за тргување на Македонската берза на електрична енергија, со што се означи почетокот на функционирањето на организираниот пазар, пазарот ден однапред во нашата земја, порача управителот на Националниот оператор на пазарот на електрична енергија (МЕМО), Симон Шутиноски, на настанот со кој се означи официјалниот почеток на работата не берзата.
„Ова значи дека денеска добивме референтни цени на македонскиот пазар на електрична енергија, кои се однесуваат на домашната побарувачка и понуда на електрична енергија. Денеска се случи безбедно и без никаков проблем тргување на електричната енергија на нашиот организиран пазар“, рече Шутиноски.
Прочитајте повеќе: Стартува берзата на струја - ќе донесе ли пониски цени?
Тој нагласи дека на првиот ден на тргување на Македонската берза учествувале 20 од вкупно 22-те компании што склучија договор со МЕМО за учество на берзата на електрична енергија. Истргувани се околу 500 мегават-часа електрична енергија, или во просек околу 20 мегават-часа во час, со просечна цена од околу 7.125 денари, која е приближна на цените во регионот и во Европа.
Според Шутиноски, берзата на електрична енергија ќе поттикне зголемени инвестиции во производствените капацитети на електрична енергија од обновливи извори, така што инвеститорите ќе имаат организиран пазар, каде што ќе можат да ја продаваат произведената енергија.
Премиерот Димитар Ковачевски, кој е во посета на САД, во писмо испратено до МЕМО по повод почетокот со работа на правата Македонска берза за тргување со електрична енергија истакна дека работата на оваа берза значи сигурност за производството на струја, сигурност за болниците, за училиштата, за сите институции што набавуваат енергија на либерализираниот пазар - односно стабилно снабдување со струја и можност за ефикасна набавка на достапни количества струја.
Вицепремиерот за економски прашања Фатмир Битиќи во својот говор рече дека отворањето на берзата на електрична енергија не е крајната цел, туку е само еден од многуте чекори што ги презема државата при создавањето современ енергетски пазар. Сопствената берза на електрична енергија, како што кажа, ќе има значајно економско и енергетско влијание во регионот и е подготвена за регионално поврзување на пазарите на електрична енергија, водејќи се од паневропскиот модел на пазар на електрична енергија.
.webp){kind=icon}
