Министерството за финансии ќе издаде зелена обврзница со камата од 4,75 проценти

Министерството за финансии ќе издаде зелена обврзница во вкупна вредност од 600 милиони денари(безмалку десет милиони евра) со камата од 4,75 проценти. Ова го најави министерот за финансии Фатмир Бесими говорејќи во рамките на 22. Годишна конференција на Македонската берза што се одржува во Охрид.

Аукцијата за зелената обврзница е закажана за 3 октомври годинава, рокот на достасување е две години, а право на учество имаат сите домашни правни и физички лица.

Во образложението на проспектот за зелената обврзница, кој што веќе го објави Министерството за финансии,  се вели дека станува збор за нова хартија од вредност, која што  има за цел финансирање нови и постојни зелени проекти односно дека овие обврзници ќе бидат наменети за поттикнување и поддршка на проекти за унапредување и заштита на животната средина.

„Средствата инвестирани во оваа зелена обврзница ќе бидат наменети за Фондот за енергетска ефикасност при Развојната банка. Фондот ќе ги користи овие средства за финансирање инвестиции за енергетска ефикасност преку одобрување кредити, издавање гаранции и одобрување грантови“, пишува во проспектот.

Во него се додава дека транспаретноста и одржливоста се клучни елементи на овој инструмент и затоа ќе биде воспоставен мониторинг на проектите финансирани од Фондот и ќе се објавуваат полугодишни и годишни извештаи за неговото работење и одржливост.

Инаку, министерот Бесими најави дека наскоро ќе се одржи аукција и на уште една граѓанска обврзница, на која понудата ќе биде десет милиони евра, а каматата пет проценти. Тој рече дека, како и во случајот на претходната аукција, доколку има поголема понуда ќе биде запишан поголем износ.

Бесими соопшти дека набрзо ќе се отвори патот македонските општини да издаваат таканаречени структурни обврзници кои ќе се користат за отплата на долгови.

Во моментов нема коментари за веста. Биди прв да коментира...

Остави коментар