.webp){kind=icon}
Рекреативната и медицинската употреба на канабисот ќе им донесе милионски приходи на земјите од Европската Унија (ЕУ). Може ли регионот Адрија да го искористи потенцијалот на ова растение со оглед на тоа што земјите располагаат со плодна почва за одгледување канабис. И додека во земјите во ЕУ полека се дозволува секој граѓанин да си одгледува три стебла канабис во својот дом за сопствена употреба, овде и медицинскиот канабис сè уште е табу-тема.
Добро утро, подолу се петте вести што ги издвоивме за почеток на денот.
Канабис – подзаборавеното зелено злато на регионот Адрија
Во регионот Адрија, конопот, дури и индустрискиот коноп, сè уште е табу иако оваа област се смета за идеална за одгледување канабис. Потенцијалот на ова производство во регионот Адрија го препознаваат и странските инвеститори, кои доаѓаат со подготвеност за големи инвестиции, но се откажуваат поради недостигот од закони, што суштински ја отежнува индустријата.
Употребата на канабис и производи од канабис за медицински цели е легализирана во Албанија, Хрватска, Македонија и делумно во Словенија, додека употребата на канабис за рекреативни цели е делумно декриминализирана во Хрватска и во Словенија. Иако легализацијата на марихуаната сè уште е табу во регионот, помеѓу земјите има значителни разлики.
Со пари од македонски канабис до фабрика за водород
Британската компанија „Хидроген утопија интернешнл - ХУИ“ (Hydrogen Utopia International) сака преку производството на медицински канабис во Македонија да обезбеди финансии што би ги инвестирала во својата технологија за добивање водород преку преработка на пластика што не може да се рециклира.
Според анализата на овој бизнис изработена од Питер Хичинс, аналитичар во британската „Прогресив рисрч“, а објавена на терминалот на „Блумберг“, станува збор за иновативен начин за обезбедување пари од кои би се финансирала изградба на фабрика за преработка на пластика што не може да се рециклира.
Пијалаците „прајм“ на пат да надминат продажба од 1,2 милијарда долари
„Прајм“ (Prime), брендот за хидратација и енергетски пијалаци поддржан од ѕвездите на социјалните мрежи Логан Пол и Олајиде Вилиамс Олатунји со прекар КСИ, се очекува да достигне продажба од 1,2 милијарда долари годинава, бидејќи менаџментот вложува пари во маркетинг за да привлече повеќе клиенти.
Поминаа две динамични години за „Прајм“ откако дебитира во јануари 2022 година, кога беше на пат за продажба од 250 милиони долари во првата година. Шишињата во боја на бонбони предизвикаа хаос по нивното пуштање, кога недостигот во Европа доведе до стампедо во продавниците, фалсификувани производи и небесно високи цени на препродажниот пазар. Некои училишта дури забранија празни шишиња, велејќи дека тие ќе станат непријатност.
Пластиката ги чини сиромашните земји десет пати повеќе од богатите
Вкупниот животен трошок за килограм пластика е околу 150 долари во земјите со низок и среден приход, што е осум пати повисоко од 19 долари за килограм во земјите со високи приходи. Ако ги земеме предвид земјите со ниски приходи, каде што трошоците се 200 долари за килограм, разликата во трошоците се зголемува за десет пати. Нееднаквите трошоци имаат значителни последици за земјите со низок и среден приход како Кенија, каде што преговарачите ќе се соберат од 13 до 19 ноември по третпат да разговараат за глобален договор со кој треба да му се стави крај на загадувањето со пластика.
Заклучно со 2019 година само девет отсто од пластичниот отпад се рециклира, а во моментов околу 60 отсто од глобалното производство на пластика наменето за производи за еднократна употреба.
„Адидас“ се надева дека следната година ќе продаде дел од својот голем инвентар на патики „јизи“
Германската компанија веќе заработи околу 750 милиони евра од продажбата на две лансирања на производите „јизи“ од мај. Тоа им помогнало да продадат околу 40 отсто од нивниот инвентар „јизи“ складиран на различни локации низ светот. Како биланс ѝ останале производи уште од околу 300 милиони евра, кои би можеле да бидат отпишани доколку „Адидас“ го уништи остатокот од обувките.
Компанијата најверојатно ќе се обиде да го продаде остатокот во 2024 година и може да генерира околу 488 милиони евра заработка пред камати, даноци и донации за добротворни групи. Тоа најверојатно ќе донесе повеќе од 950 милиони евра дополнителни пристигнувања.
