.webp){kind=icon}
Индустриската и комерцијална банка на Кина - ИЦБЦ (Industrial & Commercial Bank of China Ltd. - ICBC) најверојатно е хакирана од истата група што во изминатата година ги погоди и „Боинг“ (Boeing Co.), ИОН (ION Trading UK) и Британската пошта (Royal Mail).
Докажаната хакерска банда позната како „Локбит“ (Lockbit) е осомничена дека организирала напад за откуп против американскиот оддел на ИЦБЦ, најголемиот светски заемодавец по имот, според луѓе запознаени со ситуацијата, кои побарале да не бидат идентификувани бидејќи информациите не се јавни. Нападот резултираше со нарушување на американскиот пазар за финансии, при што некои трансакции не минуваа и од трговците беше побарано да ги пренасочат своите зделки.
„Локбит“, криминална банда која се поврзува Русија, е специјализирана за користење малициозен софтвер познат како рансомвер (анг. ransomware) за шифрирање датотеки на компјутерите на своите жртви, а потоа бара откуп за отклучување на датотеките. На почетокот на годинава тие презедоа одговорност за нападот против ИОН, кој го парализира тргувањето со деривати на пазарите за сè, од стоки до обврзници, и принуди неколку банки и брокери рачно да го обработуваат тргувањето.
Во четвртокот ИЦБЦ во соопштение потврди дека хакерскиот напад на нејзината единица за финансиски услуги резултирал со прекин на некои од системите. Банката соопшти дека спроведува темелна истрага и напредува во напорите за поправка на погодените датотеки. Заемодавецот посочи дека системите во неговото седиште и другите домашни и прекуокеански филијали, вклучувајќи ја и филијалата во Њујорк, не биле засегнати.
Прочитајте повеќе: Секторот за услуги на „Боинг“ погоден од сајбер-напад
Пред една недела „Боинг“ обелодени сајбер-напад во кој беше уништена веб-страницата на која се продаваат резервни делови за авиони, софтвер и услуги. „Локбит“ се закани дека ќе објави „чувствителни податоци“ што му припаѓаат на „Боинг“ ако не исплати откуп до 2 ноември. Хакерите го поставија името на компанијата на својата веб-страница за погодени, со одбројување точно до тој ден. Името подоцна исчезна од страницата. Повеќе експерти рекоа дека во голем број ситуации тоа значи дека компанијата најверојатно го исплатила откупот.
Неодамнешните жртви на „Локбит“ ги вклучуваат и најголемото јапонско поморско пристаниште, британската пошта, одделот за финансии на Калифорнија и канадска детска болница.
