.webp){kind=icon}
Сите важни вести овој викенд се однесуваат на самитот КОП28, најголемата конференција за климатски промени одржана досега. Конференцијата ќе трае уште две недели, а од она што сега слушнавме јасно е дека светот доцни со исполнувањето на климатските цени за намалување на емисиите на стакленички гасови до 2030 година. Видовме и интересни приказни за враќање на сибирските тундри на нивото од пред 14.000 години.
Добро утро, ова се петте клучни вести без кои не можете да го почнете денот.
ББА-анализа: НБРМ ќе олабави дури во втората половина од 2024 година
Притисокот од ЕЦБ и од Фед врз каматните стапки влезе на рамна територија. Тоа не значи пауза во рестриктивната политика, бидејќи повисоките нивоа на каматни стапки што се постигнати досега обезбедуваат поддршка за механизмот за пренос да продолжи да се движи, укажуваат од аналитичкиот тим на „Блумберг Адрија“ во новата анализа објавена на „Блумберг Адрија инсајт“.
„Преовладува расположението ’повисоки камати на подолг период‘ бидејќи стапките на инфлација, иако моментално се во фаза на дезинфлација, сè уште се во црвената зона, покажуваат отпорност и се над долгорочните цели. Тоа особено се однесува на показателите за базичната инфлација, кои ја демонстрираат нејзината лепливост“, велат аналитичарите.
За праведна енергетска транзиција на земјава и требаат барем три милијарди евра
Македонија има цел да ги намали емисиите на стакленички гасови за 82 отсто до 2030 година споредено со нивото од 1990 година. На овој начин се докажува посветеноста на земјата да ги почитува принципите на Парискиот договор и тоа претставува значителен чекор кон поодржлива, конкурентна и праведна иднина, рече министерот за економија Крешник Бектеши во своето обраќање денеска, во рамки на климатскиот самит КОП28 којшто се одржува во Дубаи, Обединетите Арапски Емирати. Тој ја презентираше Инвестициската платформа за праведна енергетска транзиција на Северна Македонија.
„Енергетскиот сектор, кој беше значаен придонесувач за емисиите на нашата земја, се наоѓа на чело на овој процес на транзиција. Владата во јуни 2023 година го усвои патоказот за праведна транзиција и воспостави структура за водење на процесот на транзиција, покажувајќи ја уште еднаш нашата посветеност и одлучност за декарбонизација на енергетскиот сектор во земјата“ рече Бектеши.
Руски милијардер ќе ја спасува климата со враќање на волнените мамути
Андреј Мелниченко, рускиот милијардер кој своето богатство го стекна со јаглен и ѓубрива, а потоа се најде под санкции по инвазијата на Украина, сега има план да ги спречи емисиите на метан од топењето на сибирскиот вечен мраз преку повторно создавање на време кога волнените мамути талкаа по тундрата.
Во раскошниот павилјон на климатскиот самит КОП28 во Дубаи, Мелниченко претставува план за обновување на дел од руската екологија од пред 14.000 години. Тоа е ексцентрична идеја за борба против многу опасен проблем – метанот е многу помоќен гас од јаглерод диоксидот и милијарди тони од него се заробени во огромната руска тундра. Обновувањето на екосистемот на леденото доба на Сибир може да го забави неговото ослободување, вели теоријата.
Загадувачите со метан најдоа виновник – сателитските снимки
Дамките во зрнестите сателитски снимки можеби не значат многу за просечниот човек, но за шпанските научници кои експериментираат со нови начини за откривање на емисиите на стакленички гасови, тие беа изненадувачко откритие.
Фотографиите и другите податоци сугерираат дека во период од 17 дена во декември 2021 година, нафтената платформа управувана од државната енергетска компанија „Петролеос Мексиканос“, позната како „Пемекс“, исфрлила тони метан во атмосферата. Истражувачите поставија хипотеза дека причината се два неисправни факели со гас и процениле дека ослободената количина е еднаква на три проценти од годишните емисии на целиот мексикански сектор за нафта и гас.
Групацијата на Ал Гор има алатка која ќе придонесе за декарбонизација
Глобалната коалиција, кооснована од поранешниот американски потпретседател Ал Гор, објави детална база на податоци која ги следи глобалните емисии на стакленички гасови до индивидуалниот загадувач. И некои од најголемите светски компании планираат да ги искористат тие податоци за да ги декарбонизираат нивните синџири на снабдување.
„Клајмат трејс“ (Climate TRACE) користи машинско учење, сателити и друга технологија за откривање и следење на емисиите на стакленички гасови. Тие информации потоа се собираат во јавен инвентар, од кој последниот викендов го објави Гор на климатскиот самит КОП28 во Дубаи. Базата на податоци опфаќа повеќе од 350 милиони извори на загадување со стакленички гасови како што се индивидуални електрани, челичарници и рударски операции. Тоа ниво на специфичност им овозможува на компаниите да изградат синџир на снабдување со ниски емисии наместо да се потпираат на податоците за емисиите што самите ги добиваат од добавувачите, рече Гевин Мекормик, коосновач на коалицијата.
