Пет вести за почеток на денот

Претседателката Гордана Силјановска-Давкова вчера донесе одлука за учество на дел од армијата во справувањето со пожарите. 

Одлуката, како што посочија од претседателскиот кабинет, е во согласност со Законот за управување со кризи, по донесената одлука на Владата од 13 август 2024 година за постоење на кризна состојба поради зголемена појава на пожари на територијата на државата.

Добро утро! Ова се петте вести што треба да ги знаете на почетокот од денот.

Зошто македонскиот пазар на капитал е речиси имун на глобалните случувања?

Минатонеделните случувања на светските берзи се споредуваат со времињата како црниот понеделник од 1987 година, финансиската криза во 2007 и 2008 година, пандемијата во 2020 година.

На критичниот 5 август поцрвене и Македонската берза, но потресот не беше силен како во глобални рамки. 

Според Васко Богдановски, инвестициски портфолио-менаџер, соосновач и извршен партнер во „Опфолио“, една од причините зад релативната стабилност на домашниот пазар и неговите незначителни реакции на светските промени е тенденцијата на домашните инвеститори фокусот да го ставаат на заработката од дивиденда.

Околу три отсто од девизните резерви на НБРМ се инвестирани во ЕСГ-обврзници

Инвестирањето на девизните резерви секаде се одвива според строго дефинирани критериуми во однос на сигурноста и ликвидноста и, доколку се запазат сите тие критериуми, постои простор да се запазат и климатските ризици.

„Некои централни банки веќе започнаа дел од портфолиото да инвестираат во зелени обврзници или во обврзници што се насочени кон социјални цели бидејќи тоа исто така влегува во дефиницијата на т.н. одговорно инвестирање“, вели Анета Крстевска, главна економистка во НБРМ, во интервју за телевизијата „Блумберг Адрија“.

„НБРМ ги следи трендовите во оваа сфера. На крајот на 2023 година околу три отсто од девизните резерви се инвестирани во тие обврзници на меѓународните пазари што се насочени кон зелени, социјални проекти“, посочува Крстевска.

Ниската продуктивност во еврозоната ја компликува задачата на ЕЦБ

Продуктивноста во еврозоната оствари едвај забележлив раст во вториот квартал и повторно беше под очекувањата на Европската централна банка (ЕЦБ). Овој извештај покажува дека централната банка може да има тешкотии да ја врати инфлацијата до целта.

Мерката за продуктивност на трудот по вработен падна за 0,4 отсто, покажуваат новите податоци објавени од ЕЦБ. Во првите три месеци од годинава овој индекс падна за 0,5 отсто, а официјалните лица очекуваа пад од 0,3 отсто за вториот квартал.

Претставници на ЕЦБ, вклучувајќи ја и претседателката Кристин Лагард, ја истакнаа важноста на „поврзаноста на профитот, платите и продуктивноста“. Доколку работите не се подобрат, продолжувањето на намалувањето на каматите може да биде доведено во прашање.

Најголемиот производител на челик предупреди за тешка криза во индустријата

Најголемиот светски производител на челик алармираше за индустриската криза во Кина, која носи потенцијал да се бранува низ целиот свет и да го втурне секторот во подлабок пад.

Условите во кинескиот сектор за челик се како „сурова зима“, која ќе биде „подолга, постудена и потешка за издржување отколку што очекувавме“, изјави претседателот на „Чајна Баову стил груп“ (China Baowu Steel Group Corp), Ху Вангминг, пред персоналот на полугодишниот состанок на компанијата, предупредувајќи на полош предизвик од големите трауми во 2008 и 2015 година.

Острата порака на Ху најверојатно ќе внесе загриженост за ривалите низ Азија, Европа и Северна Америка, бидејќи тие се борат со нов бран кинески извоз. Испораките од Кина се на пат да достигнат околу 100 милиони тони годинава, што е највисоко од 2016 година, бидејќи тамошните производители се обидуваат да го неутрализираат домашното забавување.

НАСА одлучува како двајца заглавени астронаути да се вратат на Земјата

Претставници на НАСА рекоа дека ќе им треба уште една недела за да одредат уште колку долго двајца американски астронаути ќе останат на Меѓународната вселенска станица поради проблеми со капсулата на „Боинг“ (Boeing Co.).

Астронаутите на НАСА, Бери Буч Вилмор и Сунита Суни Вилијамс живеат на Меѓународната вселенска станица од 6 јуни, кога „Старлајнер“ (Starliner) на „Боинг“ се спои со орбиталната лабораторија.

За време на нивниот лет таму, вселенската капсула се соочи со проблеми, вклучувајќи и повеќекратно истекување на хелиум и откажување на некои мотори што капсулата ги користи за маневрирање низ вселената.