.webp){kind=icon}
Холандскиот фудбалски клуб Ајакс (AFC Ajax NV) го суспендира својот главен извршен директор Алекс Крос и рече дека планира да го разреши по „силните индикации“ за инсајдерско тргување.
Клубот тврди дека Крос, кој беше и претседател на извршниот одбор на Ајакс, купил над 17.000 акции на клубот една недела пред да биде објавено неговото назначување на 2 август.
„Постапките на Крос не се во согласност со она за што се залага Ајакс“, истакна Михаел ван Праг, претседател на Надзорниот одбор на клубот, во изјава во вторникот. „Моментот на неговото купување акции укажува на инсајдерско тргување. Таквото прекршување на законот не може да се толерира од страна на јавно котирана компанија, особено кога во него е вклучен извршниот директор“.
Прочитај повеќе
Откривањето доверливи информации може да биде фатално дури и за милијардер
Навиката на милијардерот Џо Луис да им дава раскошни поволности на вработените и на соработниците го доведе до правни проблеми.
03.02.2024
Ајакс, кој моментално е петти во холандската прва лига, што е тешка сезона за клубот, во последните години се бори со менаџерски скандали. Во септември Ајакс го отпушти директорот за фудбалски прашања Свен Мислинтат поради „разочарувачки“ перформанси, набрзо по истрагата за наводен конфликт на интереси што произлезе од трансферот на дефанзивец.
Мислинтат беше наследник на долгогодишниот директор Марк Овермарс, кој мораше да се повлече во 2022 година по извештаите за несоодветни пораки испратени до неколку женски членови на персоналот.
Акциите паднаа за околу 9 отсто од времето кога се тврди дека Крос купил акции минатата година. Акциите на Ајакс се тргуваа по цена од околу 10,3 евра (11 долари) во вторникот, поништувајќи го претходниот пад.
Холандската државна телевизија НОС објави дека Крос не ја прифатил одлуката на Ајакс да го суспендира и ќе побара независно мислење од регулаторот на пазарот, познат како Холандска управа за финансиски пазари.
„Верувам дека зрачите со доверба кон вашите колеги акционери и засегнати страни кога купувате акции затоа што, исто така, самите ризикувате финансиски“, рече Крос, цитиран од НОС. „Иако тврдам дека моите намери беа добри, сега, по консултација со мојот адвокат, разбирам дека не ја донесов најразумната одлука“, рече тој.
Должностите на Крос ќе ги преземат други членови на одборот, се наведува во соопштението. Клубот наскоро ќе одржи вонредно собрание за акционери.
