.webp){kind=icon}
Цената на електричната енергија за домаќинствата од 1 јули во првиот блок останува иста, во вториот блок има зголемување од 0,85 проценти, во третиот блок од 1,92 проценти и во четвртиот блок ќе има зголемување од 1,88 проценти, додека цената на евтината струја ќе се зголеми за 0,65 проценти.
Добро утро! Ова се петте вести што треба да ги знаете на почетокот од денот.
Со готовина може да се купи речиси сè, освен акции
Важечка лична карта односно документ за идентификација и активна денарска или девизна банкарска сметка се условите што еден македонски граѓанин мора да ги исполнува доколку сака да купи акции од некоја домашна или странска компанија.
Акциите се можеби единствената стока што во Македонија не може да се плати директно во готовина, со која во земјава може да се купи буквално сè - од стан, преку автомобил, до каква било услуга. Тоа е донекаде ограничувачки ако се земе предвид дека иако има тренд на континуиран раст на безготовинските плаќања, готовината во земјава сè уште има голема улога во платниот промет.
Кај нас готовината е кралица, во Кина тоа е веќе историја
Додека готовината преовладува во регионот Адрија, Кина се претвора во општество без готовина. ЕЦБ го подготвува воведувањето на дигиталното евро до есента 2025 година, додека е-јуанот е во употреба во Кина од 2019 година. Со оглед на сеприсутноста на дигитализацијата, вистинското прашање е кога тоа ќе влијае на плаќањето стоки и услуги. Благодарение на платежните картички и користењето на апликациите за плаќање на паметните телефони, уделот на готовината како средство за плаќање стоки во повеќето развиени економии постојано се намалува.
Студијата на ЕЦБ за навиките за плаќање во еврозоната, на пример, открива дека уделот на готовинските плаќања постојано опаѓа, а пандемијата само го засили тој тренд. Така, во 2016 година готовина е искористена во 79 отсто од сите потрошувачки трансакции на физичките продажни места и меѓу физичките лица, во 2019 година тоа учество падна на 72 отсто, а уште повеќе во 2022 година, кога учеството падна на 59 отсто.
Данска ги поттикнува граѓаните да се откажат од месото
Многу Данци пораснале на сланина и путер и ги сакаат нивните традиционални свински сендвичи и ќофтиња. Овој национален прехранбен идентитет е дел од предизвикот на Данска бидејќи презема амбициозен експеримент за да го намали апетитот на своите шест милиони луѓе за месо и млечни производи.
Во обид да ги намали тоните штетни емисии во земјоделството, нордиската влада го лансира она што е прв акциски план за храна од растително потекло во светот. Стратегијата од 40 страници, која не вклучува забрани или ограничувања, вклучува голем број неконвенционални иницијативи за да ги направи оброците без месо попривлечни, вкусни и достапни.
„Хјундаи“ ќе продава електричен „инстер“ за помалку од 25.000 евра
„Хјундаи мотор“ (Hyundai Motor Co.) му се приклучува на редот на производители на автомобили што се обидуваат да го забрзаат усвојувањето електрични автомобили (ЕВ) и да ѝ се спротивстават на евтината конкуренција од Кина со модел на батерии за кој соопштија дека ќе чини помалку од 25.000 евра (26.775 долари).
Супкомпактниот теренец (СУВ) „инстер“, кој дебитираше на Меѓународниот саем за мобилност во Бусан во четвртокот, ќе биде пуштен во продажба во Јужна Кореја летово, пред да биде извезен во Европа и на Блискиот Исток, а подоцна и во пацифичко-азискиот регион, соопшти компанијата.
Барселона ќе забрани краткорочно изнајмување станови
Додека многу градови низ светот се соочуваат со слични притисоци, потегот на Барселона може да го означи најагресивниот став досега против становите за краткорочно изнајмување, кои често се наоѓаат на онлајн платформите како „Ербиенби“ (Airbnb). Градовите како Њујорк, Ванкувер и Токио сега инсистираат на тоа дека домаќините мора да живеат во становите што ги изнајмуваат, додека Сан Франциско и Сиетл го ограничуваат бројот на имоти што може да ги понуди домаќинот.
Далас забрани краткорочно изнајмување во одредени населби, додека многу други - вклучувајќи ги Лондон, Амстердам и Париз - поставија ограничувања на бројот на ноќевања на кои може да се изнајми еден стан во текот на годината.
