.webp){kind=icon}
Зоолошката градина во Скопје денеска е затворена, а како што се наведува во нивното известување залепено на самиот влез, причина се техничко-оперативни работи. Сепак, во текот на денот дел од медиумите и на социјалните мрежи беше објавено дека скопската Зоолошка градина не работи поради сомнежи за бактерија или вирус кај птиците.
„Почитувани посетители, ве известуваме дека поради техничко-оперативни работи, на ден 19.10.2024 година, сабота, Зоолошката градина нема да биде отворена за посетители. Ви благодариме за разбирањето“, стои во известувањето на Зоолошката.
Од Агенцијата за храна и ветеринарство (АХВ) за МИА потврдуваат дека во Зоолошката градина се нивни инспектори, но и дека исто така таму се изведуваат технички зафати. Засега не се соопштува која е причината за присуството на инспекторите во Зоолошката градина.
АХВ најавува дека во текот на денот ќе ја информираат јавноста преку соопштение.
Директорката на Институтот за јавно здравје, Марија Андонова, за МИА вели дека до попладнево не добиле известување од Агенцијата за храна и ветеринарство дека има потреба нивни екипи да излезат на терен и да направат епидемиолошки анкети со вработените во Зоолошката градина.
„Тоа може да се случи само доколку болеста или, како што се прошири во јавноста, 'птичјиот грип' се пренесува на луѓе. Ние сме подготвени доколку е потребно веднаш да излеземе на терен“, вели Андонова.
Поранешниот директор на Зоолошката градина Ѓорѓи Галетановски на својот профил на Фејсбук претпладнево напиша дека смртоносна бактерија „птичји грип“ е најдена во Зоолошката градина во Скопје.
Принтскрин
Во меѓувреме, реагираа и од скопската Зоолошка градина од каде во соопштение посочуваат дека без никакви докази утрово инспектори од АХВ по наредба, на како што се посочува, директорот Оливер Миланов, со оружје убивале птици во градината и нагласуваат дека е исцениран проблем со цел да се затвори Зоолошката.
„Изутринава, без налог, решение или каков било друг доказ, инспектори на АХВ придружувани од лица со оружје упаднаа во ЗОО Скопје и извршија масакр на птиците. Без образложение и без доказ до овој момент, овие лица по наредба на директорот на АХВ убија десетици птици кои слободно се шетаа во Зоолошката градина. Станува збор за украсни видови шатки и гуски кои живеат во Градски парк, а имаат природен пристап во Зоолошката градина. Целта на оваа секташка политика е да се предизвика нов измислен проблем и да се обезбеди алиби за затворање на ЗОО Скопје, со цел наштетување на угледот“, се вели во соопштението на Зоолошката градина.
Подоцна во текот на денот со официјално соопштение се огласија и од Агенција за храна и ветеринарство (АХВ) од каде информираа дека по угинување на една гуска лоцирана во езерцето во Зоолошка градина Скопје и поставен сомнеж за болеста авијарна инфлуенца (птичји грип), по лабораториско тестирање на угинатата птица, со лабораториски резултат од Факултетот за ветеринарна медицина – Скопје потврден е случај на присуство на виосокопатоген сој на вирусот на Птичји грип H5N1.
„Во текот на денешниот ден, од страна на надлежен официјален ветеринар спроведен е надзор во Зоолошката градина и наредени се мерки за надзор на болеста, а извршено е хумано убивање и нештетно отстранување на следните видови птици: 24 патки, 6 гуски, 5 кокошки и една чавка, која била присутна на локацијата. Наредени се мерки согласно Законот за ветеринарно здравство и Правилникот за мерки за сузбивање и искоренување на болеста авијарна инфлуенца“, велат од АХВ.
Со цел сузбивање на болеста и спречување на нејзино ширење надвор од зоолошката градина кај животните и кај луѓето, нагласуваат, забранет е влез и излез на животни од зоолошката градина, ограничено е движењето на луѓе (посетители) во зоолошката градина, наредени се мерки за дезинфекција, испитување на другите птици присутни во зоолошката градина за присуство на вирусот на птичји грип, зголемување на биосигурносните мерки и други мерки, со цел сузбивање на болеста и спречување на нејзино ширење надвор од зоолошката градина кај животните и кај луѓето.
„Мерките ќе бидат на сила 21 ден, почнувајќи од денес за кој временски период и зоолошката градина ќе биде затворена за посетители. Последните случаи на појава на високопатогена авијарна инфлуенца беа во 2022 година, во населените места Градец, Лески и Виница, место Селце во општина Штип и во близина на Злокуќани, општина Карпош“, прецизираат од АХВ.
Текстот е ажуриран со реакцијата од ЗОО Скопје и соопштението на АХВ
