САД воведуваат ограничувања на инвестициите во кинески технолошки компании

Американскиот претседател Џо Бајден во средата потпиша извршна наредба со која се ограничуваат одредени американски инвестиции во Кина, со цел да се заштитат чувствителните технологии. Пекинг го осуди овој потег како прекршување на принципите на пазарната економија и фер конкуренцијата, пишува германската агенција ДПА (DPA).

Бајден рече дека „прогласува национална вонредна состојба за да одговори на заканата од напредокот на земјите што предизвикуваат загриженост во сферата на чувствителните технологии и производите што се клучни за воените, разузнавачките, надзорните или сајбер-способностите на таквите земји“.

Според деталите од извршната наредба, Бајден ја назначил Кина, вклучително Хонгконг и специјалниот административен регион Макао, како „земји кои предизвикуваат загриженост“.

Претставник на американската влада рече дека овој потег има цел да ја спречи Кина да стекне и да користи напредна технологија за модернизација на сопствената војска и со тоа да ја загрози националната безбедност на САД. Тој исто така посочи дека новите правила се насочени конкретно кон контрола на полупроводници, одредени системи за вештачка интелигенција и квантна информатичка технологија.

Кога Бајден ја презеде функцијата во јануари 2021 година, тој ги остави во сила царините против Пекинг што ги воведе неговиот претходник Доналд Трамп. Во исто време, американскиот претседател започна големи инвестиции во САД за да ги зајакне синџирите на снабдување на Вашингтон и да обезбеди поголема независност од Кина.

САД исто така воведоа ограничувања за извозот за да го отежнат пристапот на Кина до американската технологија.

Пекинг не молчеше на овој потег. „Кина внимателно ќе го следи развојот на настаните и решително ќе ги заштити нашите права и интереси“, изјави во четвртокот портпаролот на кинеското министерство за надворешни работи. Тој додаде дека вистинската цел на Вашингтон е „да ѝ се ускрати на Кина правото да се развива и себично тежнее кон американска надмоќ на сметка на другите“.

Портпаролот исто така посочи дека потегот ги дестабилизира глобалните индустриски и снабдувачки синџири, им штети на интересите и на Кина и на САД и ја поткопува глобалната деловна заедница.

Потсетуваме дека напредните технологии, како што е вештачката интелигенција, сè повеќе се во фокусот на дискусиите меѓу официјални лица од различни земји. Кон средината на минатиот месец, Советот за безбедност на ОН ја одржа првата седница посветена на темата за вештачката интелигенција. Имено, Велика Британија ја почна оваа иницијатива за меѓународен дијалог за влијанието на вештачката интелигенција поради заканата за глобалниот мир и безбедност.

Во моментов нема коментари за веста. Биди прв да коментира...

Остави коментар