Кина ги осуди и ги нарече „технолошки тероризам“ обидите на САД да ги спречат ASML Holding NV и Nikon Corp. да продаваат важна технологија за производство на чипови во земјата.
Портпаролот на кинеското Министерство за надворешни работи, Жао Лиџијан, ги критикуваше ограничувањата на извозот што ги бара Вашингтон за време на редовниот брифинг во Пекинг. Тој не објасни дали Кина планира некаков одговор на потегот.
Предложените ограничувања на Вашингтон за холандската компанија ASML ќе го прошират постоечкиот мораториум за продажба на најнапредните системи во Кина, во обид да се попречат кинеските планови земјата да стане светски лидер во производството на чипови.
Доколку Холандија се согласи, тоа значително би го проширило опсегот и класата на опрема за производство на чипови која е забрането да се извезува во Кина, што може да им нанесе сериозен удар на кинеските производители како Semiconductor Manufacturing International Corp. и Hua Hong Semiconductor Ltd.
Американски официјални претставници лобираат кај своите холандски колеги да му забранат на ASML да продава некои од неговите постари системи со длабока ултравиолетова литографија или DUV, велат луѓе запознаени со ова прашање.
Овие машини се една генерација зад најсовремените, но сепак се најчестиот метод за правење одредени помалку напредни чипови во автомобилите, телефоните, компјутерите, па дури и роботите.
Американските власти, исто така, се обидуваат да извршат притисок врз Јапонија да престане да ја испорачува истата технологија до кинеските производители на чипови, вели еден од изворите.
Јапонскиот Nikon се натпреварува со ASML во оваа сфера.
.webp){kind=icon}