.webp){kind=icon}
Германската министерка за надворешни работи Аналена Баербок рече дека Европа ќе биде подобро подготвена доколку Доналд Трамп се врати во Белата куќа, по шокот што настана откако тој ја презеде претседателската функција во 2016 година.
„Тогаш ретко кој во Европа можеше да замисли дека ќе има американски претседател што ќе го доведе во прашање НАТО“, сојуз што е „животно осигурување“ за Европејците, рече Баербок во неделата во интервју за телевизијата „Блумберг“. „Толку многу работи во минатото беа тотален шок за нас“, истакна таа.
Со оглед на тоа што Трамп ја предводи трката за номинација во Републиканската партија со голема разлика во пресрет на прелиминарната сезона следната година, Баербок е на опсежно патување во САД, кое вклучува и разговори со републиканците, пред да присуствува на Генералното собрание на Обединетите нации оваа недела. Германскиот социјалдемократски канцелар Олаф Шолц изјави дека би сакал втор мандат за претседателот Џо Бајден.
Трамп „презеде некои активности што беа повеќе од иритирачки за нас“, рече Баербок, една од најистакнатите германски политичари од редот на зелените, во интервјуто во Њујорк.
Во исто време таа рече дека „не треба да бидеме наивни“ и дека германската влада ќе биде подготвена да работи со Трамп доколку тој победи на претседателските избори во 2024 година.
Пред Њујорк, Баербок отпатува во Остин и Вашингтон, каде што се сретна со републиканците, вклучувајќи ги и гувернерот на Тексас, Грег Абот, и Мич Меконел.
Баербок рече дека им кажала на републиканските пратеници колку биле шокантни годините од мандатот на Трамп, но изразила уверување дека американската поддршка за Украина ќе продолжи, без оглед кој е претседател.
„Ви треба двопартиска поддршка“, рече Баербок. „Ова е причината зошто ми беше важно да разговарам со републиканците“.
Баербок, првата жена министер за надворешни работи на Германија, е една од најотворените поборници во кабинетот на Шолц за испорака на оружје во Украина. Пред нејзиното патување во САД, поранешната лидерка на партијата на зелените го посети Киев и му вети на својот украински колега продолжување на германската воена поддршка.
