Прво интервју на Путин со западен новинар по инвазијата: Целите во Украина уште не се постигнати

Рускиот претседател Владимир Путин кажа дека неговата земја сè уште не ги постигнала своите цели во Украина и во интервјуто со поранешниот водител на „Фокс њуз“, Такер Карлсон, рече дека ќе размисли за преговори доколку САД престанат да доставуваат оружје за Киев.

„Сè уште не сме ги постигнале нашите цели“, рече Путин во интервјуто направено на 6 февруари во Москва, кое Карлсон го објави на својата веб-страница во четвртокот. Ова е првпат рускиот лидер да даде интервју за лице од западните медиуми откако нареди инвазија на Украина во февруари 2022 година.

„Му пренесуваме на американското раководство дека ако навистина сака да запре воената акција, треба да престане да снабдува оружје и тогаш сè ќе заврши за неколку недели и ќе можеме да разговараме за некои услови“, кажа Путин. 

Меѓутоа, САД и нивните сојузници ги отфрлија барањата на Русија за таква капитулација и нема знаци дека која било страна е подготвена за сериозни разговори, додека војната се приближува кон прагот од две години.

Кога Карлсон праша дали НАТО може да ја прифати моменталната руска контрола на окупираната украинска територија, Путин одговори: „Реков, нека размислат како да го направат тоа достоинствено. Има опции ако има волја“.

Запрашан дали е подготвен да каже „честитки, НАТО, победивте“ и да ја задржи ситуацијата на теренот како што е, претседателот одговори: „Тоа е тема на преговори што сега никој не сака да ги води или, поточно кажано, тие се подготвени, но не знаат како да го направат тоа“.

Неговите коментари следуваат откако „Блумберг њуз“ минатиот месец објави дека Путин преку индиректни канали им сигнализирал на САД дека е отворен за дискусија за завршување на војната, вклучувајќи и за идните безбедносни аранжмани во Украина.

Карлсон, кој е конзервативен новинар и поддржувач на Доналд Трамп, ја искористи својата медиумска платформа за да ја доведе во прашање поддршката на САД за Украина и да го брани Кремљ. Руската државна телевизија редовно емитува снимки од неговите објави.

Размена на затвореници

Во интервјуто, Путин посочи дека може да се постигне договор за ослободување на затворениот американски новинар Еван Гершкович, навестувајќи дека репортерот на „Волстрит журнал“ може да биде вратен во размена на затвореници.

„Имаме одредени услови за кои се разговара преку канали меѓу специјалните служби“, рече Путин (71). „Верувам дека може да се постигне договор“.

Тој алудираше на случај со човек што го нарече „патриот“, кој беше затворен за убиство во една европска земја, што очигледно се однесува на Вадим Красиков, кој отслужува доживотна казна затвор во Германија за убиството на поранешен чеченски бунтовник во Берлин во 2019 година. Русија претходно предложи враќање на Красиков во разговорите за размена на затвореници.

Како одговор на прашањата на Карлсон, Путин исто така ги повтори обвиненијата против Гершкович, кои беа целосно отфрлени од „Волстрит журнал“ и американската влада, која вели дека репортерот бил „погрешно приведен“ од Москва.

Во изјава по објавувањето на интервјуто со Путин, „Волстрит журнал“ посочи дека е „охрабрен што гледа желба од Русија за договор што ќе го врати Еван дома“, нарекувајќи ги наводите за шпионирање против него „фикција“.

Поголемиот дел од двочасовниот разговор на Карлсон со рускиот лидер беше посветен на повторувања на долгогодишните критики на Путин кон САД и нивните сојузници и неговите контроверзни ставови за историјата на односите меѓу Украина и Русија.

Претседателска политика

Со оглед на тоа што претстојат претседателските избори во САД во 2024 година, Путин ја отфрли идејата на Карлсон дека промената на администрацијата во САД може да доведе до поинаков пристап кон војната. „Тоа не е прашање на лидерство“, рече тој. „Тоа е начин на размислување на елитата“.

Путин додаде дека имал „добри лични односи“ со претседателот Џорџ В. Буш и слични со Трамп кога бил во Белата куќа. Од друга страна, тој рече дека не разговарал со претседателот Џо Бајден од пред инвазијата на Украина.

Трамп, кој се чини дека најверојатно ќе ја добие републиканската номинација во обидот да се врати во Белата куќа, рече дека би го сметал Карлсон за потенцијален партнер за кандидатурата против Бајден во ноември.

Пред интервјуто, Карлсон во видеообјава рече дека „повеќето Американци немаат поим зошто Путин ја нападнал Украина или кои се неговите цели сега“.

Добредојде од Москва

Во текот на повеќе од два часа, Карлсон не направи многу за да го предизвика Путин додека рускиот лидер ги изложуваше своите тврдења зошто САД и нивните сојузници се виновни за војната во Украина.

Иако Карлсон пред состанокот во Москва рече дека „ниту еден западен новинар не се потрудил да го интервјуира“ Путин, Кремљ соопшти дека одбил голем број барања од други медиуми, претпочитајќи го помалку конфронтирачкиот пристап на Карлсон.

Поранешниот новинар на „Фокс њуз“ беше добредојден во Москва дури и кога Кремљ започна најстрога акција во последните децении за да ја уништи домашната критика за војната. Противниците на инвазијата беа затворени или побегнаа во егзил, додека пратениците минатиот месец едногласно усвоија нов закон со кој ѝ се дозволува на државата да го конфискува имотот на секој што е осуден за „дискредитација“ на акциите на руската војска во Украина.

Интервјуто се одржа во моменти кога повеќе од 60 милијарди долари од американската воена помош за Украина се заглавени во партиски расправии, при што Бајден го обвини Трамп за потопување на најновиот обид во Конгресот за постигнување договор. Украина предупреди дека е при крај со муниција за да се одбрани од руските сили, кои окупираат делови од источниот и јужниот дел на земјата.

Во моментов нема коментари за веста. Биди прв да коментира...

Остави коментар