Експлозии во Иран, Израел вели дека ја покажал способноста за напад

Иранските државни медиуми утрово објавија за експлозии во градот Исфахан, додека американските медиуми цитираа официјални лица што тврдат дека Израел извршил одмазднички напади врз својот главен ривал.

Системите за противвоздушна одбрана (ПВО) над неколку ирански града беа активирани, објавија државни медиуми, откако државната телевизија соопшти дека експлозии се слушнале во близината на централниот град Исфахан.

Израел претходно предупреди дека ќе возврати откако Иран упати стотици проектили и беспилотни летала врз Израел во текот на минатиот викенд. Повеќето од нив беа пресретнати.

Иранската новинска агенција „Фарс“ (Fars News Agency) објави дека се регистрирани „три експлозии“ во близината на воената воздухопловна база Шекари во северозападниот дел на провинцијата Исфахан, додека портпаролот на иранската вселенска агенција Хосеин Далиријан изјави дека „неколку“ беспилотни летала биле „успешно соборени“.

Поради ова, Иран по втор пат неделава го затвори својот воздушен простор, а Израел доби понизок кредитен рејтинг, објави „Блумберг“ (Bloomberg).

„Фарс“ наведува дека не се познати детали за нападот на Исфахан, но се верува дека најголемиот број дронови испратени кон Израел во нападот од 13 април биле од тој град.

Нуклеарните постројки во Исфахан се пријавени како „целосно безбедни“, објави иранската новинска агенција „Тасним“, повикувајќи се на „сигурни извори“.

Американските телевизии Еј-би-си њуз (ABС News) и  Си-би-ес њуз (CBS News) објавија дека нападите биле извршени од Израел, цитирајќи американски официјални претставници.

Денешниот напад „имаше намера да му сигнализира на Иран дека Израел има способност да нападне во внатрешноста на земјата“, изјавил неименуван израелски функционер за „Вашингтон пост“.

Меѓународната агенција за атомска енергија (МААЕ) потврди дека иранските нуклеарни локации не се погодени, по извештаите за напад во Исфахан.

МААЕ исто така го повтори својот повик и Иран и Израел да покажат максимална воздржаност, нагласувајќи дека атомските капацитети никогаш не треба да бидат цел.

„Продолжуваме да ја следиме ситуацијата и ги повикуваме двете страни на екстремна воздржаност. Нуклеарните објекти никогаш не треба да бидат цел во воени конфликти“, се наведува во соопштението на МААЕ на социјалната мрежа X.

Извештаи за напади и во Сирија 

Израелските сили рано утрово ја нападнаа позицијата на сириската армија на југот на Сирија, соопшти сириската Опсерваторија за човекови права со седиште во Лондон.

„Израелските напади беа насочени кон радарите на сириската армија меѓу провинциите Суеида и Дера“, посочи директорот на Опсерваторијата, Рами Абдел Рахман.

Тој додаде дека нападите биле изведени „во време кога израелски авиони интензивно летале над регионот Дера“, како и дека сириската воздушна одбрана не се активирала. 

Американската амбасада во Израел со предупредување до вработените

Амбасадата на САД во Израел денеска им порача на своите вработени и нивните семејства да ги ограничат своите движења по извештаите дека Израел извршил напад врз цели во Иран.

„По извештаите дека Израел извршил одмазднички напад во Иран, вработените во американската влада и членовите на нивните семејства се ограничени од лични патувања надвор од поголемиот дел од Тел Авив, Ерусалим до понатамошно известување“, се наведува во безбедносното советување објавено од Амбасадата на нејзината веб-страница. 

Тензиите меѓу Тел Авив и Техеран се зголемија по нападот на Иран врз Израел на 13 април, со повеќе од 300 беспилотни летала и проектили. Потоа Израел предупреди дека ќе се одмазди за нападот. Инаку, нападот на Иран врз Израел беше одмазда за нападот врз иранскиот конзулат во Дамаск, во кој загинаа неколку високи офицери. Иран за нападот во Сирија го обвини Израел, а Тел Авив ниту потврди ниту демантираше дека стои зад акцијата. 

Во моментов нема коментари за веста. Биди прв да коментира...

Остави коментар