На 14.215 македонски граѓани лани им биле издадени дозволи за престој по прв пат во Европската Унија, што е намалување во однос на 2019 година кога вакви дозволи им биле издадени на 26.653 граѓани, покажуваат новите податоци на европската статистичка организација „Еуростат“. За време на пандемиската 2020 година дозвола за престој во ЕУ по прв пат добиле 16.393 македонски граѓани. Во овој тригодишен период семејните причини биле најчесто образложение за добивање дозвола за престој.
Во регионот, најмногу дозволи за престој по прв пат во Европската Унија лани биле издадени на граѓани на Албанија, на второто место е Србија, а на третото место е Босна и Херцеговина.
Според податоците на „Еуростат“, во 2021 година, речиси 3 милиони (2.952.300) дозволи за прв престој биле издадени во ЕУ на државјани кои не се членки на ЕУ. Бројот се зголеми за 31 проценти (или +693.700) во споредба со 2020 година, достигнувајќи го нивото пред пандемијата забележано во 2019 година (2.955.300).
Рекорден број дозволи за работен престој
Дозволите за прв престој издадени од причини поврзани со вработување достигнаа рекордно високо ниво. Дури 45 проценти од вкупниот број издадени први дозволи за престој во 2021 година биле поради вработување (1,3 милиони дозволи). Ова претставува зголемување од 47 проценти (+429 100) во споредба со 2020 година. Тоа е, исто така, најголем број на дозволи издадени поради вработување од почетокот на водењето на оваа статистика. Семејните причини учествуваат со 24 проценти, образовните причини со 12 проценти, додека другите причини, вклучително и меѓународната заштита, изнесуваат 19 проценти.
Покрај зголемувањето на бројот на дозволи за престој издадени од причини поврзани со вработување, и другите главни причини забележаа зголемување во 2021 година во споредба со 2020 година: 42 проценти кај причините поврзани со образование (+105 000), 14 проценти за семејни причини (+ 88 600) и 15 проценти за други причини, вклучително и меѓународна заштита (+71 000).
Кои се најбарани дестинации?
Во 2021 година, Полска издала третина од сите први дозволи за престој доделени во ЕУ на државјани кои не се членки на ЕУ (967.300, или 33 проценти од вкупните дозволи издадени во ЕУ), а потоа следат Шпанија (371.800, или 13 проценти) и Франција (285.200, или 10 проценти). Најголем релативен пораст на вкупниот број издадени дозволи во 2021 година во споредба со 2020 година е забележан во Италија: +159 проценти (од 105.700 во 2020 година на 274.100 во 2021 година). По Италија следат Финска (+132 проценти, од 24.800 на 57.300) и Полска (+62 проценти, од 598.000 на 967.300).
Од друга страна, единствените намалувања на вкупниот број издадени дозволи во 2021 година во споредба со 2020 година се забележани во Германија (-41 проценти, од 312.700 во 2020 година на 185.200 во 2021 година), Литванија (-7 проценти, од 22 500 до 21.000) и Хрватска (-4 проценти, од 35.100 до 33.600).
Полска за работа, Франција за студирање
Полска беше на врвот на листата на први дозволи за престој поврзани со вработување, со 790.100 дозволи издадени во 2021 година, што сочинува 27 проценти од сите први дозволи издадени во ЕУ. Франција издаде најмногу дозволи поврзани со образованието (90.600 дозволи, или 3 проценти). Земјите на ЕУ со најголем број дозволи издадени од семејни причини во 2021 година беа Шпанија (159.200, или 5 проценти), Италија (120.500, или 4 проценти) и Франција (93.300, или 3 проценти). Полска, исто така, беше првата земја во ЕУ која издава дозволи за престој поради други причини, со 120.500 дозволи (4 проценти) издадени во 2021 година.
Дури 875.800 Украинци добиле дозволи за прв престој во земјите на ЕУ во 2021 година, што ги прави најголемата група на државјанства меѓу сите приматели (од кои 83 проценти се издадени од Полска). Следат граѓаните на Мароко (150.100 дозволи, од кои 50 проценти се издадени во Шпанија) и Белорусија (149.000, од кои 88 проценти се издадени во Полска). Граѓаните на овие земји сочинуваат 40 проценти од сите први дозволи за престој издадени во 2021 година.
.webp){kind=icon}
Во моментов нема коментари за веста. Биди прв да коментира...