Во време на сè почести геополитички тензии, трговски бариери, војни и голема нестабилност на пазарите на капитал, еден совет сè уште важи: останете долгорочен инвеститор и не дозволувајте пазарните превирања да ве исфрлат од рамнотежа. Иако одредени нарушувања може да отворат простор за нови можности, просечниот инвеститор треба да остане смирен и насочен кон пошироката слика.
Аналитичкиот тим на „Блумберг Адрија“ особено ја истакнува важноста на диверзификацијата на портфолиото, што станува клучна во вакви нестабилни времиња. Според нивните препораки за диверзификација, оптималното инвестиционо портфолио за долгорочен инвеститор би можело да изгледа вака: 75 отсто акции, 10 отсто обврзници, 4 отсто суровини, 1 отсто криптовалути и 10 отсто имот во форма на готовина или инструменти на пазарот на пари.
Што се однесува до акциите, предложената распределба вклучува 35 отсто вложувања на пазарот на САД, 10 отсто во европски акции, 10 отсто во пазарите во развој и значајни 20 отсто во земјите од поширокиот регион на јужна и источна Европа (ЈИЕ). Токму овој регион останува вредносно потценет, а истовремено покажува знаци на силно економско приближување кон Европската унија (ЕУ). Ова го потврдуваат и резултатите на пазари како словенечкиот, грчкиот или полскиот, кои веќе подолго време бележат натпросечни приноси.
Кај обврзниците, се препорачува исто така разновидна изложеност: 3 отсто од портфолиото во европски обврзници, 3 отсто во американски и 4 отсто во обврзници од ЈИЕ регионот. Со оглед на зголемената глобална нестабилност, суровините стануваат сè поважен дел од портфолиото. Златото и бакарот остануваат класичен избор. Златото како заштита од инфлација, а бакарот е иднината бидејќи се користи во вештачката интелигенција, дата центрите и електричните автомобили. Дополнителен потенцијал се гледа и во земјоделските суровини, кои добиваат на важност во контекст на климатските промени и несигурноста во снабдувачките ланци.
Криптовалутите, иако сè уште се перципираат како ризична класа на имот, сè повеќе влегуваат во сериозните инвестициски портфолија благодарение на растечките приливи во ЕТФ фондовите и интересот на државни и институционални инвеститори. Во тој контекст, тие имаат смисла како помал дел од алтернативните вложувања.
Важно е да се нагласи дека наведено не претставува инвестициски совет, туку предлог за диверзифицирано портфолио за оние кои размислуваат долгорочно и сакаат да ја зачуваат и зголемат вредноста на својот имот во предизвикувачки времиња.
--Изјава за одговорност: предложените портфолија не претставуваат финансиски совет.
.webp){kind=icon}
Во моментов нема коментари за веста. Биди прв да коментира...