text size
Американските државни обврзници ги избришаа сите добивки остварени по најавата на американскиот министер за финансии Скот Бесент дека ќе се зголеми откупот на долгорочниот долг, што е знак дека инвеститорите сметаат оти мерката ќе биде само краткорочно решение за ограничување на трошоците за задолжување.
Приносот на 30-годишните американски државни обврзници во четвртокот се зголеми за шест базични поени, на 5,26 отсто, враќајќи се на нивото од пред објавувањето на планот во средата. Приносот на 10-годишните обврзници исто така порасна за околу шест базични поени.
Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот:
Доаѓа ли скапа зима - кое греење ќе биде најисплатливо
Во услови кога вестите за намалено производство на струја предизвикуваат страв дека клима-уредите може да престанат со работа, речиси никој не помислува дека многу брзо ќе дојде време за греење. Цените на енергентите растат од почетокот на конфликтот на Блискиот Исток, на крајот на февруари годинава, а сегашната суша само го зголемува проблемот.
Дополнителен притисок прави и цената на гасот, кој од почетокот на конфликтот во Иран поскапе за 80 отсто, а побарувачката за него допрва ќе расте затоа што започнува периодот на полнење на европските складишта.
Ова е причината да провериме кој енергент ќе биде најисплатлив оваа зима.
Што ќе им правиме: Отпадот од соларните панели вреди милијарди
Сончевата енергија во моментов учествува со околу половина од вкупниот инсталиран капацитет на обновливи извори на енергија во светот. Оттука, соларните панели ќе имаат клучна улога во енергетската транзиција и постигнувањето на глобалните климатски цели.
Но токму овој забрзан раст носи нов проблем. Имено, соларните панели се проектирани да функционираат меѓу 25 и 30 години, што значи дека некои од нив уште сега треба да почнат да се демонтираат за да бидат повлечени од употреба.
Не е потребно многу за да пукне берзанскиот балон
Лесно е да се аргументира дека американскиот пазар на акции се наоѓа на територија на балон. На крајот на краиштата, главните показатели упатуваат во иста насока: циклично приспособениот сооднос цена-добивка на Шилер; реалната премија за ризик кај акциите; индикаторот на Бафет.
Се разбира, само затоа што нешто е балон не значи дека наскоро ќе пукне. Балоните често стануваат многу поголеми и траат подолго од очекуваното, бидејќи ширењето на балонот го одржува растот на инвестициите и профитот што првично довел до неговото создавање. Уверувањата на поддржувачите дополнително се зацврстуваат, додека скептиците ја губат увереноста и влијанието.
Американците и инфлацијата – трошат повеќе, но купуваат помалку
Американските потрошувачи не се имаат откажано. Иако, го чувствуваат притисокот. „Волмарт“ (Walmart Inc.), кој во четвртокот го објави својот најслаб раст на продажбата за повеќе од шест години, првенствено поради својот фармацевтски бизнис, изјави дека потрошувачката останува на конзистентни нивоа дури и додека клиентите прават компромиси за да ја приоритизираат вредноста.
Соочени со високи цени, намалување на заштедите и забавување на растот на платите, Американците бараат добри зделки во продавниците и уникатна стока, а се воздржуваат од големи купувања.
„Алибаба“ со 75 отсто помал профит поради големите инвестиции во ВИ
Компанијата, која од лидер во онлајн трговијата стана главен играч во секторот за ВИ, забележа пораст на приходите од девет проценти, во согласност со очекувањата, благодарение на силната побарувачка за компјутерски капацитет што го нуди нејзината клауд дивизија.
Сепак, нето добивката се намалила за три четвртини на 10,5 милијарди јуани (1,6 милијарди долари), додека слободниот паричен тек забележал одлив од 6,6 милијарди долари, што одразува зголемени трошоци за проекти за ВИ и компјутерска инфраструктура.
.webp){kind=icon}
