Просечната плата на вработените во администрацијата е пониска од 500 евра или околу 200 евра под просечната плата на државно ниво. Тие неделава протестираат и бараат 30 отсто зголемување, Владата ги разбира (иако се сомнева во мотивите за протестот). Ставот на власта е дека е јасно дека платите се ниски, но треба да биде јасно и дека можностите на буџетот се лимитирани.
А за тоа колку се лимитирани можностите на буџетот говори и веста што ја презедовме од терминалот на „Блумберг“ во која се наведува дека Македонија се подготвува за издавање еврообврзница годинава. Всушност, „Блумберг“ ја пренесе изјавата на министерката за финансии Гордана Димитриеска-Кочоска во рамките на форумот на Централна и Источна Европа во Виена. Во соопштението за настанот што истиот ден го испрати Министерството не се споменува еврообврзница.
И домашните и меѓународните експерти предупредуваат дека лек за високиот буџетски дефицит е сериозна даночна реформа. Можеби и зголемување на стапката на ДДВ, затоа што таа е под регионалниот и европскиот просек.
Економистите проценуваат дека ризиците и натаму се високи. Пред сè затоа што на македонскиот извоз не му се пишува добро. Во однос на инфлацијата, анкетата на НБРМ не покажува позначителни промени во очекувањата. Годинава таа ќе изнесува три отсто.
Прочитајте повеќе:
ЕСГ влегува во македонската регулатива преку законот за сметководство
Владата ќе и овозможи на „Бехтел и Енка“ полесно да ангажира работници од странство
Глобално, главните вести се вратат околу можното завршување на конфликтите. Некако паралелно со договорот за примирје меѓу Израел и Хамас дојде и изјавата на Зеленски дека шансите се поголеми да заврши и војната во Украина годинава. „Блумберг бизнисвик Адрија“ неделава анализираше и какви ракети користеа двете страни во оваа војна во претходните три години, колку што трае конфликтот.
Главен лик во насловите на глобалните вести и неделава е Илон Маск. Пред денот кога Тикток ќе биде изгасен во САД, стигна веста за можноста Илон Маск да ја спаси мрежата. Но во исто време беше објавено и дека Илон Маск ги измамил акционерите на Твитер за повеќе од 150 милиони долари додека подготвувал понуда за преземање на оваа социјална мрежа, тврди американската Комисија за хартии од вредност (Securities and Exchange Commission – SEC), која веќе поднесе тужба.
Сето ова се случува на неколку дена пред Трамп да ја преземе претседателската позиција во САД. На инаугурацијата в понеделник почесни гости, освен најбогатиот Маск, ќе бидат и следните двајца на листата милијардери Безос и Закерберг.
Прочитајте повеќе:
Половина од топ 10 акции во регионот Адрија се македонски
Зошто растат приносите на обврзниците и што значи тоа за регионот?
Неделава анализиравме кои се причините што не е искористен природниот потенцијал во регионот Адрија за инвестиции во обновливи извори на енергија. Во сите земји недоволното вложување е резултат на обемната бирократија и недоволните државни стимулации.
Во контекст на стимулациите, „Блумберг бизнисвик Адрија“ направи детален преглед на подемот на кинескиот производител на електрични возила БЈД.
Прочитајте повеќе:
Во ЕУ секое седмо ново возило е со нулта емисија, во Македонија фали нултата
Само неколку автомобили имаат реална цена: Тест на германски АДАК
И неделава траеше борбата со пожарите во Лос Анџелес. Енергетскиот снабдувач „Едисон интернешнал“ (Edison International Inc.) во јужна Калифорнија се соочува со тужби во кои се посочува неговата опрема како причина за еден од пожарите што го опустошија вториот по големина град во САД.
.webp){kind=icon}
