Се разгорува трговската војна – пет вести на денот

Канада од вчера воведе нови царини од 25 проценти на производи од САД вредни околу 30 милијарди канадски долари (20,8 милијарди американски долари), вклучително и челик и алуминиум. Потегот доаѓа откако администрацијата на Доналд Трамп продолжи со воведување глобални давачки за увоз. Од официјална Канада дојдоа најави дека ќе се обидат заедно со ЕУ да зголемуваат притисокот врз новата американска администрација со цел да се стави крај на трговската војна.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.

Во Македонија лани продадени недвижности за над милијарда евра

Во секторот недвижности лани за првпат се свртеле над милијарда евра. Податоците од Агенцијата за катастар за 2024 година покажуваат дека биле извршени вкупно 22.548 трансакции, а нивната вредност изнесува 1.006.685.832 евра. Близу половина од вредноста на купопродажбите или над 490 милиони евра отпаѓа на становите, а во текот на 2024 година биле купени 8.018 стана. Во однос на 2023 година биле продадени 500 стана повеќе, но нивната вредност била поголема за 60 милиони евра.

Во податоците што „Блумберг Адрија“ ги побара од катастарот нема детали за тоа во кои општини се продавале најскапите станови, ниту пак е наведена просечната цена на квадратен метар во земјава. Ваквите податоци порано се објавуваа во рамките регистарот за цени и закупи, кој не е ажуриран од третиот квартал во 2020 година. Сегашното раководство на катастарот не ги знае причините зошто процесот прекинал, но вели дека ќе го врати во живот од следниот месец.

Станови од 3.000 евра квадрат одат како алва уште неизградени

И покрај тоа што цената за квадратен метар достигна и до 3.000 евра на најатрактивните локации во центарот на Скопје, становите што се градат во моментов таму се продаваат многу брзо. Барем така велат инвеститорите. Деновиве од терен направивме едно мало истражување за продажбата на нови станови во централното градско подрачје. На некои од најексклузивните локации, како на пример кај кружниот тек во близината на Градскиот парк, за квадратен метар ќе треба да издвоите и 3.000 евра.

Всушност, веќе не можете, затоа што и во двете згради што се градат на таа локација во моментов, сите станови се веќе продадени, некаде околу педесет вкупно. Од компанијата што е инвеститор на едната ни понудија и нешто поевтина опција, од 2.800 евра за квадрат, во друга зграда што ја прават во близината на поранешното кино „Карпош“.

Веќе не е штедлив и рационален - Мерц ја подготвува Германија за револуција

Во Европа сме навикнати на револуции, но моментално редот е на инаку рационалните и резервирани Германци. На земјата ѝ претстојат неколку клучни дена, со оглед на тоа што Долниот дом на парламентот започнува дебата за тоа дали да се заобиколи озлогласеното фискално правило за зголемување на трошоците за одбрана и да се донесе одлука за инфраструктурен фонд од 500 милијарди евра.

Најмалку станува збор за безбедноста, туку многу повеќе преку неа за закрепнувањето на закочениот европски економски мотор. Мерките не само што ќе ја бранат Германија од рускиот реваншизам туку и ќе ја зајакнат економски и ќе ја модернизираат нејзината инфраструктура. Но жешката тема ја разбранува тамошната политичка сцена бидејќи најавените мерки ја нарушуваат самата суштина на идентитетот на финансиски претпазливата и економски солидна држава.

Компаниите бараат начини да се заштитат од царините на Трамп

Производителот на „Оземпик“, „Ново Нордиск“, планира да произведува повеќе од своите лекови за американскиот пазар во таа земја; „Боинг“ ризикува проблеми со синџирот на снабдување и повисоки трошоци за авионите кои можеби нема да може да ги пренесе; кинескиот онлајн трговец на мало „Шејн“ нуди стимулации за своите врвни добавувачи на облека да воспостават нови производствени капацитети во Виетнам.

Во корпорациите, директорите ги пресметуваат потенцијалните трошоци поради тарифите, нивното влијание врз продажбата, профитот и пазарните удели. Многу компании формираат „тарифни работни групи“ бидејќи сакаат да ја ублажат болката од мерките. Во првите недели на функцијата, Трамп воведе царини на околу 1,4 трилиони долари на увезена стока од Канада, Мексико и Кина – што е тројно повеќе од 380 милијарди долари царини за кинеските стоки кои беа воведени за време на неговиот прв мандат, според процените на „Такс фондејшн“. 

Побарувачката за технолошки акции ги стабилизира пазарите

Финансиските пазари се стабилизираа во последниве денови по распродажбата на почетокот на оваа недела, кога американскиот претседател Доналд Трамп најави нова рунда трговска војна со остатокот од светот. Сепак, водечките индекси во Европа, САД и Азија завчера и вчера останаа во минус. Фјучерсите за европскиот репер индекс Euro Stoxx 50 паднаа за 0,5 отсто, додека договорите за американскиот технолошки индекс Nasdaq 100 изгубија повеќе од еден отсто од својата вредност, откако податоците покажаа дека американската инфлација се лади побрзо од очекуваното.

Податоците за инфлацијата, од друга страна, даваат надеж дека последиците од американските царини нема да бидат толку тешки за да ја турнат најголемата економија во рецесија. На завчерашното продолжено тргување, американскиот производител на чипови „Интел“ изненади, а неговите акции добија околу 10 отсто откако компанијата објави дека го именувала Лип-Бу Тан за нов извршен директор. Од друга страна, берзите беа притиснати од падот на акциите на „Адоб“ (Adobe), кои загубија околу 4 отсто од вредноста по објавувањето на пониски од очекуваните профити во вториот квартал.