Помал ДДВ за прв стан, а повисок за втор стан - пет вести на денот

Српската „Алта банка“ чека зелено светло за да даде понуда за преземање до 100 проценти од обичните акции со право на глас издадени од „Стопанска банка Битола“. Компанијата вчера соопшти дека понудата за преземање ќе биде дадена по цена од 3.777 денари по акција. „Алта банка“ заедно со поврзаните лица веќе поседува 19.439 обични акции или 4,97 проценти од вкупниот број на обични акции издадени од „Стопанска Банка Битола“.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.  

Поврат на ДДВ – можно решение за купување прв стан

Доколку данокот на додадена вредност се зголеми од сегашните 5 на 18 отсто, товарот ќе падне на купувачите. Градежниците велат дека најпогодени ќе бидат младите брачни парови кои прв пат купуваат стан. Затоа тие ќе бараат од Владата да ја продолжи мерката според која за купување прв стан се плаќа повластена стапка на ДДВ. Разговорите за ова се закажани за септември.

„Ако дојде до зголемување на стапката на ДДВ, сите градители ќе се обидат тој трошок да го пренесат на купувачите, а нивната куповна моќ и така е ограничена, на некои локации дури и невозможно е за некои граѓани да купат стан по цените кои важат во моментов. Тоа ќе доведе до дополнително намалување на побарувачката, затоа јас се наведам дека нема да дојде до тоа“, изјави за ТВ Блумберг Адрија Андреа Серафимовски, претседател на Здружението за градежништво при Стопанската комора на Македонија.

Кредити, картички, вработени: За што има најмногу поплаки до македонските банки?

Во текот на 2024 година во Народната банка биле примени вкупно 233 поплаки од физички лица, од кои 98 проценти се со наводи за неправилности во работењето на деловните банки, една поплака се однесува на работењето на штедилница и за првпат се јавува една поплака за работењето на платежна институција. 

„Народната банка, во текот на 2024 година, постапуваше итно во врска со сите примени дописи и поплаки. За сите поплаки беа побарани и се добиени податоци и информации од страна на финансиските институции, вклучително и информации за активностите преземени од нивна страна за разрешување на предметните поплаки“, наведуваат од Народната банка во извештајот за поплаките кон банките и штедлиниците.

На што се подготвува Ворен Бафет? Го анализиравме неговото портфолио

Ворен Бафет на крајот од годината ќе се повлече од врвот на „Беркшир Хатавеј“ (Berkshire Hathaway), а на негово место ќе дојде Грег Абел. Сепак, тој и понатаму останува под будното око на инвеститорите, кои внимателно го следат секој негов чекор. Тоа и не е ништо чудно, бидејќи пророкот од Омаха, како што го нарекуваат, во текот на својата долга инвестициска кариера умееше да намириса добри шанси што нему и на многумина други им донесоа огромно богатство.

На веб-страницата „Гуру фокус“ (GuruFocus) редовно се следи портфолиото на Ворен Бафет и „Беркшир Хатавеј“. Последното јавно достапно е со датум 30 јуни 2025 година и се базира на формуларот 13F, поднесен до Комисијата за хартии од вредност и берза СЕК (SEC). Според најновите податоци, портфолиото се состои од акции на 41 американска компанија, со вкупна вредност поголема од 257 милијарди долари.

Вински маратон од 2.817 километри низ балканските лозја

Винскиот туризам, во вистинска смисла, како сè уште да не е откриен на просторите на поранешна Југославија. Секако, некои држави порано го препознаа тоа и посериозно проучија барем дел од можностите, но сè уште се потпираат на своите главни туристички адути - море, планини, реки, езера, недопрена природа, гастрономија и етнозачини. Но, винската туристичка приказна може да биде огромна шанса за развој и на урбаните и на руралните подрачја.

Белите вина од Посавина, словенечките Брда, истарската малвазија, автохтоните сорти на јадранскиот регион, херцеговската „игра“ на жилавка и блатина „од камен“, вранецот што истовремено ги спојува и разделува Црна Гора и Македонија, заедно со српската темјаника како суверен владетел на локалниот Хорека-пазар, во неколку збора му ја опишуваат на патникот намерник потенцијалната винска понуда.

S&P 500 паѓа веќе четврти ден по ред. Дали е време за купување?

Сигналите дека инфлацијата и понатаму останува главна грижа за функционерите на американската централна банка Фед придонесоа за повисоки приноси на обврзниците и ги зголемија загубите во повеќедневниот пад на технолошките акции, кој избриша милијарди долари создадени во претходниот раст. Инвеститорите со нетрпение го очекуваат говорот на Џером Пауел в петок, додека записите од последниот состанок на Фед ја зголемија загриженоста дека централната банка можеби нема да спроведе пошироко олеснување на политиката, како што очекуваат многумина.

Заедно со „величествената седумка“ падна и американскиот индекс S&P 500, веќе четврти ден по ред. Цените на големите технолошки компании се во црвено – „Енвидија“ (Nvidia), на пример, во два дена изгуби пет отсто од вредноста. Индексот Nasdaq 100 падна за еден отсто. „Палантир технолџис“ (Palantir Technologies), кој годинава можеше да се пофали со двојно зголемување на вредноста на акцијата, за шест дена изгуби 20 отсто.