text size
Глобалните менаџери на капитал повторно се насочуваат кон Кина по години воздржаност, привлечени од рекордниот раст на акциите и напредокот на земјата во високотехнолошките индустрии. „Голдман Сакс“ (Goldman Sachs Group Inc.) соопшти дека глобалните хеџ-фондови минатиот месец биле најактивни во домашните акции во последниве години – остар контраст со 2021 година, кога некои од клиентите го сметаа пазарот за „неисплатлив“ за вложување.
Добро утро, ова се останатите вести што се важни за почеток на денот.
Што ни вети 5Г, а што (не) добивме?
Кога околу 2018 година телекомуникациската индустрија почна агресивно да го најавува 5Г како следната револуција, очекувањата беа огромни: брзини до стопати поголеми од 4Г, латенција од само неколку милисекунди и можност да се поврзат милијарди уреди во реално време. Визијата беше дека оваа генерација ќе биде основата за автономни возила, паметни градови, интернет на нештата (Internet of things / IoT) и дигитална индустријализација.
Неколку години подоцна, сликата е поделена. Во Азија, Америка и делови од Латинска Америка, 5Г веќе значајно го менува начинот на кој функционираат индустриите и граѓаните. Но во Европа процесот е побавен, често поради регулаторните процедури, високите трошоци за изградба и потребата операторите да ја монетизираат претходната 4Г-инфраструктура.
„Кар шерингот“ и електричните возила го менуваат рентакар-бизнисот во Македонија
Изнајмувањето возило одамна излезе од клишето рентакар за бизнис или туристичко патување. Тоа веќе не претставува ниту луксуз ниту начин на задоволување некоја конкретна потреба за која немаме соодветно превозно средство, туку повеќе се вбројува во стандардна ставка на трошок или стил на работа и живот. Сѐ почесто компаниите користат изнајмени возила за своите тековни деловни активности, исто како што и луѓето сѐ помалку патуваат со сопствени автомобили, а изнајмуваат возило таму каде што престојуваат за да бидат мобилни локално.
Надвор од вообичаеното еднодневно или повеќедневно изнајмување возило, редовна практика стана и долгорочното изнајмување, како и употребата на такви возила мерено во часови или дури и минути.
Франција ги таргетира богатите за излез од политичката криза
Додека премиерот Себастијан Лекорну се обидува да ја задржи политичката стабилност, 39-годишниот политичар е под притисок од левицата, крајната десница и дури од сопствените центристички сојузници да вклучи повисоки давачки за богатите како дел од напорите за намалување на најголемиот дефицит во еврозоната.
Петтиот премиер на земјата за помалку од две години во петокот ги критикуваше повиците за воведување данок на богатство, вклучувајќи еден предлог именуван по економистот Габриел Зукман. Но, тој ја остави отворена можноста за мерки кои би ги погодиле најбогатите, велејќи дека е невозможно да не се слушне барањето на Французите за „даночна правда“.
„Епл“ треба да претстави апликација во стилот на ЧетГПТ
„Епл“ (Apple) треба да ја претстави својата внатрешна апликација слична на ЧетГПТ (ChatGPT) од „Опен еј-ај“ (OpenAI) како јавна апликација, за да ѝ даде поголем кредибилитет на својата ревидирана стратегија за вештачка интелигенција (ВИ).
Компанијата веќе има намера да го модернизира својот виртуелен асистент Сири (Siri), но ако не понуди издржана платформа за вештачка интелигенција, ризикува да остане во сенка на конкурентите.
Данската „Генмаб“ ќе го купи производителот на лекови против рак „Мерус“ за 8 милијарди долари
Данската компанија „Генмаб“ (Genmab A/S) се согласи да ја купи холандската „Мерус“ (Merus NV), производител на лекови што развива терапија против рак на главата и вратот, за околу 8 милијарди долари.
„Генмаб“ ќе ги откупи акциите на „Мерус“ по цена од 97 долари по акција во готово, соопштија денеска двете компании. Тоа претставува премија од околу 41 отсто во однос на последната цена на тргување на акциите на „Мерус“ котирани во САД, од 26 септември. „Блумберг њуз“ (Bloomberg News) претходно објави дека „Генмаб“ и „Мерус“ водат сериозни разговори. Акциите на „Генмаб“ паднаа до 4,4 отсто во тргувањето во Копенхаген.
.webp){kind=icon}
