Данската „Генмаб“ ќе го купи производителот на лекови против рак „Мерус“ за 8 милијарди долари

Данската компанија „Генмаб“ (Genmab A/S) се согласи да ја купи холандската „Мерус“ (Merus NV), производител на лекови што развива терапија против рак на главата и вратот, за околу 8 милијарди долари.

„Генмаб“ ќе ги откупи акциите на „Мерус“ по цена од 97 долари по акција во готово, соопштија денеска двете компании. Тоа претставува премија од околу 41 отсто во однос на последната цена на тргување на акциите на „Мерус“ котирани во САД, од 26 септември. „Блумберг њуз“ (Bloomberg News) претходно објави дека „Генмаб“ и „Мерус“ водат сериозни разговори. Акциите на „Генмаб“ паднаа до 4,4 отсто во тргувањето во Копенхаген.

Преземањето ја нагласува стратегијата на „Генмаб“ да ја зајакне својата линија на производи преку зделки што го прошируваат присуството во областа на тумори и технологии за антитела од нова генерација. Тоа следува по аквизицијата од 1,8 милијарда долари на американската биотехнолошка компанија „Профаунд био“ (ProfoundBio Inc.) објавена минатата година, со која „Генмаб“ доби пристап до иновативни терапии што комбинираат антитела со лекови против рак.

„Генмаб“ развива терапии базирани на антитела против рак и други сериозни болести, вклучувајќи го и својот блокбастер-лек „дарзалекс“ (Darzalex), третман против рак на коскената срцевина (мултипен миелом), кој се продава на глобално ниво преку „Џонсон и Џонсон“ (Johnson & Johnson). Компанијата има и соработки со фармацевтските компании „Еб Ви“ (AbbVie) и „Ново Нордиск“ (Novo Nordisk).

Според соопштението, аквизицијата на „Мерус“ се очекува да биде финансирана преку комбинација од сопствен готовински капитал и околу 5,5 милијарди долари неконвертибилен долг, за кој обврската ја презеде „Морган Стенли“ (Morgan Stanley Senior Funding Inc.).

„Мерус“, со седиште во Утрехт, Холандија, е котиран на Nasdaq и има пазарна капитализација од околу 5,2 милијарди долари. „Генмаб“ има пазарна вредност од приближно 118 милијарди круни (18,5 милијарди долари).

Акциите на „Мерус“ нагло пораснаа откако компанијата во мај објави дека нејзиниот експериментален лек „петосемтамаб“ бил поефикасен од актуелниот стандард на лекување во намалувањето на туморите кај пациенти со рак на главата и вратот, кога се користи во комбинација со „кејтруда“ (Keytruda).

Според „Блумберг интелиџенс“ (Bloomberg Intelligence), се очекува лекот да стане блокбастер и до 2030 година да оствари продажба од над 1 милијарда долари.

„Мерус“ исто така ја тестира ефикасноста на лекот и во третман на напредна форма на рак на дебело црево, што претставува многу поголем и потенцијално поисплатлив пазар од оној за рак на главата и вратот.

Помалиот конкурент „Бикара терапеутикс“ (Bicara Therapeutics) исто така развива третман за истата состојба, но заостанува зад „Мерус“.