Американската морнарица собори ирански дрон кој се движел кон американски носач на авиони во Арапското Море, што ги вознемири пазарите на нафта среде зголемени тензии меѓу Вашингтон и Техеран. Истовремено, американската администрација останува на ставот дека в петок, во Истанбул, ќе има разговори меѓу претставници на САД и Иран.
Од друга страна, Европската унија се обидува да ги смири тензиите со САД. ЕУ ќе предложи партнерство за критични минерали на САД со цел да се намали влијанието на Кина, обидувајќи се да ја обликува иницијативата на администрацијата на Трамп за склучување глобални договори оваа недела.
Добро утро, ова се останатите пет вести што се важни за почеток на денот.
Македонскиот буџет за социјална помош покус за над 36 милиони евра
Буџетските средства за социјални надоместоци првпат беа намалени лани, но годинава кратењето е значително. Оваа ставка во буџетот за 2026 година е помала за 2.244.000.000 денари (36,5 милиони евра) или 15,7 отсто помалку во споредба со 2025 година. Ова е најголемото кратење на расходната страна на буџетот за годинава.
Од Министерството за социјална политика, демографија и млади велат дека кратењето на сумата за годинава е резултат на можностите и приоритетите на државата.
Добрите години драстично го менуваат вашето портфолио - зошто ребалансот е клучна одлука во 2026 година?
Во 2025 година повеќето инвеститори сметаа дека постапиле правилно. Пазарот растеше, портфолијата се зајакнуваа, а бројките на извештаите изгледаат охрабрувачки. Сепак, под површината се крие проблем што ретко се споменува додека сè оди нагоре.
Портфолијата денес честопати повеќе не го носат ризикот што инвеститорите свесно го избрале, туку ризикот што пазарот тивко им го наметнал. Токму тука лежи парадоксот на добрите години, тие не само што ја зголемуваат вредноста на портфолиото туку честопати и го трансформираат во нешто што инвеститорот никогаш немал намера да го поседува.
Како да инвестирате во „Спејс екс“ пред очекуваната котација на берза?
Соѕвездието Моноцерос (Monoceros), слабо видливо наспроти Млечниот пат, со векови го окупирало небото како „еднорог“. Уште еден вселенски еднорог? „Спејс екс“ (Space Exploration Technologies Corp) на Илон Маск.
Некогашната споредна работа на милијардерот-претприемач, за помалку од две децении, еволуираше од нова идеја - ракети за повеќекратна употреба - во еден од најценетите стартапи во светот. Компанијата, со предложенo вреднување од 1,5 билиони долари кога ќе почне да котира на берзата во 2026 година, лансира сателити, управува со интернет услугата „Старлинк“ (Starlink) и се смета за клучен подизведувач на НАСА, превезувајќи астронаути до и од Меѓународната вселенска станица.
Преглед на берзите: Акциите паѓаат од рекордните нивоа, нафтата поскапува
Продажбата на технолошките акции ги повлече берзите од речиси рекордните нивоа, при што акциите продолжија да паѓаат додека цената на нафтата скокна поради нови геополитички ризици. Златото и среброто се искачија по историскиот пад. Биткоинот падна на најниско ниво од изборната победа на претседателот Доналд Трамп.
Падот кај производителите на софтвер го оптовари тргувањето, откако автоматизациската алатка на „Антропик“ (Anthropic) ги засили грижите дека нивните основни бизниси се загрозени. S&P 500 падна за 1,4 отсто, а Nasdaq 100 се намали за 2,3 отсто и покрај солидната прогноза на „Палантир“ (Palantir Technologies Inc.) Енергетските компании се приклучија кон растот на суровата нафта откако американската морнарица собори ирански дрон кој се движел кон носач на авиони во Арапското Море.
Биткоинот падна на најниско ниво од победата на Трамп
Биткоинот падна на најниското ценовно ниво откако Доналд Трамп повторно ја презеде Белата куќа пред нешто повеќе од една година, бришејќи ги добивките што ги оствари водечката криптовалута по изборната победа на крипто-наклонетиот американски претседател.
Најголемата криптовалута според пазарна вредност го продолжи речиси четиримесечниот пад, спуштајќи се под 74.424,95 долари – најниската цена во 2025 година. Токенот падна на тоа ниво на 7 април, откако првичниот тарифен план на Трамп ги потресе финансиските пазари ширум светот. Биткоинот падна за цели 6 отсто до 73.762 долари во вторникот, а сега поевтин за повеќе од 15 отсто од почетокот на годината.
.webp){kind=icon}
