Трката за иден лидер на Германија моментално се води во Давос, Швајцарија, каде што социјалдемократскиот канцелар Олаф Шолц и неговиот ривал, водечкиот демохристијански кандидат Фридрих Мерц, ги презентираат своите визии за тоа како да заживее најголемата европска економија.
И двајцата се обидуваат да ја придобијат глобалната бизнис-елита собрана на Светскиот економски форум, а битката на идеи што се одвива таму е една од најважните, не само за Германија, која оди на нови избори на 23 февруари, туку и за целиот регион.
Мерц најверојатно ќе го промовира својот план за намалување на корпоративните даноци, што е во остар контраст со поттикнувањето на инвестициите преку задолжување за кое се залага Шолц.
Минатата година поранешниот германски министер за финансии Кристијан Линднер беше пркосен во Давос, инсистирајќи на тоа дека Германија не е „пациентот на Европа“, туку дека е само „уморна“. Сега, со континуираните докази дека економскиот мотор на регионот не функционира и може дополнително да биде погоден од најавените царини на американскиот претседател Доналд Трамп, замаглувањето на вистината е завршено.
Податоците од Германија минатата недела покажаа дека 2024 година беше втора последователна година на пад, обележана со продолжен пад на кинеската побарувачка, енергетска криза, проблематичен автомобилски сектор…
Покрај тоа, цела Европа се бори со конкурентноста, инвестициите и одбраната. Политичките превирања во Германија и во Франција само ја отежнуваат ситуацијата.
Фридрих Мерц/Bloomberg Mercury
„На германскиот народ е да одлучи, но јасно е дека политичкиот состав на претходната администрација мора да се промени“, рече потпретседателот на инвестициската компанија „Блекрок“ (BlackRock Inc.) Филип Хилдебранд за телевизијата „Блумберг“ во Давос. „Промената ќе биде позитивна, а потоа ќе видиме дали таа промена може да се преточи во европското лидерство“.
Мерц, чиј традиционално пробизнис-блок има двоцифрена предност пред централнолевичарската СПД на Шолц во анкетите, би можел да добие најтопло добредојде. Лидерот на Христијанско-демократската унија (ЦДУ) веќе изрази значително пооптимистичко мислење за новиот американски претседател Трамп од повеќето Германци, нарекувајќи го „многу предвидлив лидер“ со јасна програма. Исто така, политичката платформа на Мерц за скок во економијата вклучува повисок праг на данок на доход и пониски даноци на корпорациите.
Шолц остро го осуди тој став месецов, велејќи дека обичните луѓе ќе мора да ја платат сметката со тоа што ќе мора да се скратат пензиите и социјалната помош. Шолц се залага за користење фонд финансиран од задолжување од 100 милијарди евра за да се поттикнат јавните и приватните инвестиции во инфраструктурата и да се воведат даночни олеснувања. Исто така, тој сака да ја зајакне домашната побарувачка со намалување на даночното оптоварување за 95 отсто од домаќинствата, финансирано со повисоки даноци за многу богатите, и да ги зголеми детските бенефиции, да ги намали даноците за основните прехранбени производи и да воведе премија за купување на германските електрични возила.
Олаф Шолц/Bloomberg
Иако тврди дека долгот на Германија од 62 отсто од БДП е многу низок во споредба со другите земји, Мерц инсистира дека уставно дефинираниот праг на долгот не треба да биде загрозен.
За Холгер Шмидинг, економист во германската банка „Беренберг“, корпоративната елита веројатно би претпочитала комбинација од политиките на секоја партија.
„За компаниите, пониски даноци, помалку регулативи и подобри стимулации за повеќе работа се поважни од ветувањата за инвестиции финансирани од долгови“, рече тој. „Меѓутоа, многу компании се исто така за олеснување на границите на долгот“, додаде тој, јавува „Блумберг“.
Излегувањето на демократите на Линднер од владата поради ова прашање беше причина за предвремени избори, но преостанатите коалициски партнери на Шолц поддржуваат олабавување на должничката кочница.
Сепак, кој и да победи на изборите, речиси сигурно ќе му треба барем еден коалициски партнер, така што резултатот од преговорите веројатно ќе вклучи малку од секоја платформа.
.webp){kind=icon}
Во моментов нема коментари за веста. Биди прв да коментира...