Надежите дека еврозоната може да спречи рецесија добија дополнителен поттик, бидејќи Германија им пркоси на очекувањата со уште еден позитивен квартален извештај за економски раст, иако растот е драстично забавен во Франција и во Шпанија.
Растот на цените на енергијата, рекордната инфлација и растечките каматни стапки го оптоварија производството низ континентот во третото тримесечје. Но денешните податоци покажуваат дека Германија успеа да оствари раст од 0,3 отсто во периодот јули-септември. Растот на потрошувачките цени е мешан. Во Франција станува збор за најбрзо темпо на раст во последните 25 години, додека во Шпанија е значајно под процените.
Bloomberg Mercury
Мноштвото извештаи стигнуваат непосредно пред подготовките за претстојната зима, полна со предизвици за Европа. Невообичаено топлото време ги олеснува сметките за греење, а владите трошат стотици милијарди евра за да ја ублажат кризата што се одразува на трошоците за живот.
Европската централна банка (ЕЦБ) настојува да ја врати инфлацијата под контрола, но наскоро може да се зголеми болката, бидејќи ги подигнува стапките над нивото што поддржува економски раст. ЕЦБ на вчерашниот состанок одлучи да ја зголеми референтната каматна стапка уште за 75 базични бодови.
Бруто-домашен производ (БДП) на Германија
Растот на најголемата европска економија во третиот квартал забрза за 0,3 проценти во споредба со претходниот и со тоа ги изненади аналитичарите, чии прогнози беа дека економската активност ќе се намали за 0,2 отсто.
Додека германската влада го осмислува пакетот субвенции за поголемиот дел од потрошувачите на природен гас, откако Русија ги намали испораките, германската Бундесбанк очекува производството да се намали значајно оваа зима.
Анкета на ЕЦБ
Експертите што беа дел од анкетата на ЕЦБ ги ревидираа во нагорна линија своите прогнози за инфлацијата до 2024 година. Сега очекуваат раст на потрошувачките цени во просек за 8,3 проценти оваа година, 5,8 отсто во 2023 година и 2,4 проценти во 2024 година. Во меѓувреме се очекува дека базичната инфлација на долг рок ќе се задржи на 2,1 отсто, што претставува намалување од 2,2 проценти во однос на резултатите од претходната анкета.
Инфлација во Шпанија
Шпанската економија драматично забави во третото тримесечје, поради тоа што брзата инфлација сериозно се одрази на потрошувачката. БДП порасна за 0,2 отсто во однос на претходните три месеци, што е малку под процените на аналитичарите од „Блумберг“, кои предвидуваа раст од 0,3 отсто.
Падот на потрошувачката од домаќинствата и слабиот извоз влијаат на активноста во четвртата најголема економија во еврозоната. Меѓутоа, инфлацијата во октомври забави веќе трет месец по ред, а тоа дополнително ги намалува трошоците за енергија.
Потрошувачките цени пораснаа за 7,3 отсто во однос на минатата година, што претставува своевидно намалување во однос на септември, кога изнесуваа 9 отсто, и е многу пониско од очекувањата на аналитичарите, кои предвидуваа 8,1 отсто. Инфлацијата таму го достигна својот врв во јули, кога беше 10,7 проценти, а оттогаш се намалува поради интервенциите на Владата, која ги ограничи трошоците за енергија.
БДП на Австрија
Австриската економија падна за 0,1 отсто во третото тримесечје, бидејќи послабата побарувачка во светот им наштети и на апетитите за извоз од Австрија. Претходно, БДП таму порасна за 1,9 отсто во второто тримесечје.
Инфлација во Франција
Инфлацијата во Франција во октомври порасна повеќе од очекуваното, достигнувајќи рекордни 7,1 отсто. Економистите проценуваа раст од 6,5 проценти. Благодарение на напорите да се ограничат трошоците за енергија, Франција беше со една од најниските стапки на инфлација во Западна Европа. Но тоа можеби нема да потрае, бидејќи Владата планира од следната година да дозволи да се зголемат сметките за домаќинствата дури за 15 проценти, истовремено ограничувајќи ја помошта што ќе се презема понатаму.
Но притисоците врз цените се зголемуваат и шират, па овој месец ги опфатија енергијата, храната и индустриските производи. Инфлацијата веројатно ќе достигне ново највисоко ниво на крајот од годинава, предвидува статистичката агенција INSEE.
БДП на Шведска
Шведската економија порасна во третото тримесечје и покрај инфлацијата, пркосејќи им на очекувањата за пад во земјите надвор од еврозоната.
Bloomberg Mercury
БДП на Шведска се зголеми за 0,7 проценти во периодот од јули до септември во однос на претходните три месеци, покажуваат податоците на шведската статистичка агенција. Тоа може да поттикне поголемо покачување на каматите следниот месец од страна на Централната банка на Шведска.
.webp){kind=icon}
