.webp){kind=icon}
Стапката на инфлација во Велика Британија падна трет месец по ред, останувајќи тврдоглаво двоцифрена пет пати над целното ниво на Банката на Англија (БоЕ). Индексот на потрошувачките цени во јануари се зголеми за 10,1 отсто на годишно ниво, што е намалување од 10,5 проценти, колку што беше претходниот месец. Највисокото инфлаторно ниво во последните 41 година во Велика Британија беше достигнато во октомври лани, кога цените на годишно ниво пораснаа за 11,1 проценти.
Економистите очекуваа мало забавување до 10,3 проценти. Гувернерот на БоЕ, Ендрју Бејли, се надева дека инфлацијата драстично ќе опадне оваа година, бидејќи цените на енергијата ќе се олеснат и економијата ќе влезе во рецесија. Додека БоЕ е загрижена дека недостигот на работници ги зголемува платите и се заканува со инфлациска спирала, бројките од овој месец им даваат на креаторите на политиката простор да чекаат пред да го разгледаат следниот потег во врска со каматните стапки.
Движење на потрошувачките цени и целта на централната банка / Bloomberg Mercury
„Падот на инфлацијата можеби не е доволен за да го промени курсот на монетарната политика. Континуираните силни притисоци врз платите го зголемуваат ризикот инфлацијата да стане позацврстена и потрајна, што ја прави банката понеподготвена да се сврти кон нова стратегија“, рече Јаел Селфин, главен економист во КПМГ (KPMG UK).
Фунтата го продолжи падот по објавувањето на податоците, паѓајќи дури за 0,7 проценти на текот на денот, односно до 1,2086 долари. Министерот за финансии Џереми Хант го поздрави падот, но рече дека владата ќе работи да ја преполови инфлацијата оваа година.
„Иако секој пад на инфлацијата е добредојден, борбата е далеку од завршена. Високата инфлација го задушува растот и предизвикува болка за семејствата и бизнисите“, рече Хант во изјавата.
Падот во последниот месец најмногу се должи на намалените цени на бензините, заедно со намалувањето на ценовните притисоци во рестораните и кафулињата. Тоа делумно беше компензирано со скокот на цената на алкохолните пијалаци и тутунот. Трошоците за патување со авион и автобус се намалија по големиот пораст во декември.
„Цената на мебелот се намали повеќе отколку ова време минатата година, во согласност со традиционалните новогодишни распродажби. Постојат дополнителни индикации дека трошоците со кои се соочуваат бизнисите растат побавно, поттикнати од падот на цените на суровата нафта, електричната енергија и нафтата. Сепак, деловните цени остануваат високи во целина, особено челикот и прехранбените производи“, вели главниот економист на ОНС (ONS), Грант Фицнер.
Базичната инфлација, без енергија, храна, алкохол и тутун, падна на 5,3 проценти во 12-те месеци до јануари 2023 година од 5,8 отсто. Инфлацијата во услужниот сектор, кој будно го следи БоЕ, забави на шест проценти од 6,8 отсто. Трошоците за храна скокнаа за 16,8 проценти, држејќи се на рекордно високо ниво.
Инфлацијата го достигна врвот низ развиениот свет, но останува повисока од просечната во Обединетото Кралство. Таа изнесува 9,2 проценти во Германија, седум отсто во Франција и 6,4 отсто во САД.
Движење на инфлацијата во САД, Обединетото Кралство и еврозоната / Bloomberg Mercury
Банката на Англија очекува брз пад на инфлацијата во текот на 2023 година, по повлекувањето на цените на енергијата, достигнувајќи четири проценти до крајот на годината. Тоа е сè уште двојно повеќе од стапката од два отсто, како поставена цел на БоЕ.
